صوبائی وزیر پارلیمانی امور راجہ بشارت نے کہا ہے کہ نگران وزیر اعلیٰ کیلئے دیے گئے ہمارے نام اپوزیشن کے دیے گئے ناموں سے ہر لحاظ سے بہتر ہیں۔

تفصیلات کے مطابق راجہ بشارت نے میڈیا سے گفتگو کرتے ہوئے کہا کہ نگران وزیر اعلیٰ کیلئے دو پارلیمانی کمیٹیاں بنائی گئی تھیں، اس کے اجلاس میں دو نام پر بات ہوئی، جو نام ہم نے دئیے ان کو اگر کسی بھی پیمانے پر دیکھیں تو اپوزیشن سے بہتر ہیں۔

دو دنوں سے نامزد لوگوں کی درگت بن رہی ہے

راجہ بشارت نے کہا کہ دو دنوں سے نامزد لوگوں کی درگت بن رہی ہے، اپوزیشن دو ناموں پر اڑی رہی، ہم نے نصیر احمد کا نام بھی دیا دو بیوروکریٹ کے نام دئیے، فیصلہ یہ ہوا ہے کہ دونوں اطراف کے نام الیکشن کمیشن کے پاس جائیں گے۔

الیکشن کمیشن بہتر شخص کا نام سامنے لائے

میڈیا سے گفتگو کرتے ہوئے ان کا کہنا تھا کہ الیکشن کمیشن چاروں امیدواروں کے کردار کو سامنے رکھ کر بہتر شخص کا نام سامنے لائے، ہمارے پاس سارے فورم ہیں اگر ایسے شخص کو سامنے لایا گیا جو متنازعہ ہو تو عدلیہ سمیت ہر جگہ جائیں گے۔

ہم سے بہتر نام ہو گا تو بہتر ہی ہو گا

انہوں نے کہا کہ آج بھی جو نام ہم نے دیئے ان کے ناموں سے ہر لحاظ سے بہتر ہیں کیونکہ ہم نے ملی بھگت سے نام نہیں دئیے، ہم سے بہتر نام ہو گا تو بہتر ہی ہو گا۔

ضرور پڑھیں؛ وزیراعلیٰ پنجاب سے سبطین خان اور راجہ بشارت کی ملاقات، سیاسی صورتحال پر گفتگو