نواز شریف نے (ن) لیگ کو پنجاب میں انتخابات کی تیاری کی ہدایت کردی ہے۔

تفصیلات کے مطابق وزیراعظم شہباز شریف کی زیرصدارت مسلم لیگ ن کی سینئر قیادت کا اجلاس ہوا جس میں اجلاس میں وفاقی وزراء، معاونین خصوصی اور ماہرین آئینی امور شریک ہوئے۔

پارٹی ذرائع کے مطابق اجلاس میں مسلم لیگ ن نے پنجاب اور خیبر پختونخوا میں بھرپور الیکشن لڑنے، قومی اسمبلی اور دیگر دو صوبوں کے انتخابات اپنے مقررہ وقت پر کرنے کا فیصلہ کیا ہے۔

اجلاس میں مؤقف پیش کیا گیا کہ لیگی اراکین پارلیمان نواز شریف کے ساتھ تھے اور ہیں، پی ٹی آئی کے ڈوبتے جہاز میں کوئی سوار ہونا پسند نہیں کرے گا۔

 پارٹی قائد نواز شریف اور چیف آرگنائزر مریم نواز بھی اجلاس میں ویڈیو لنک کے ذریعے شریک ہوئیں۔

یہ بھی پڑھیں؛ نواز شریف کی ایک ماہ میں انٹرا پارٹی انتخابات کرانے کی ہدایت

اس موقع پر نواز شریف نے پارٹی کو پنجاب میں بھرپور شرکت کی ہدایت دی اور اس بات پر بھی ہدایت دی کہ قیادت الیکشن کے لئے خود بھی تیار ہو اور ورکرز کو بھی متحرک کرے۔

نواز شریف نے کہا کہ انتخابی مہم میں عمران خان کے دور میں ہونے والے معاشی، سفارتی و سیاسی نقصانات بارے آگاہ کیا جائے۔

اس موقع پر نواز شریف نے مریم نواز کو رواں ماہ کے دوران ہی وطن واپس جانے کی ہدایت بھی کر دی۔

یہ بھی پڑھیں؛ وزیر اعظم شہباز شریف کی وطن واپسی، توانائی پر اجلاس طلب

اجلاس میں وزیر اعظم شہباز شریف نے کہا کہ کل سابق صدر آصف علی زرداری سے ملنے ان کی رہائش گاہ جاؤں گا۔

وزیر اعظم شہباز شریف نے مزید کہا کہ عمران خان ملک و قوم کو بلیک میل کرنے کی کوشش کر رہا ہے جبکہ اسے قوم مسترد کر چکی ہے۔

علاوہ ازیں مطابق سماجی رابطے کی ویب سائٹ ٹوئٹر پر وفاقی وزیر اطلاعات مریم اورنگزیب نے اپنے ایک بیان میں کہا کہ پاکستان مسلم لیگ (ن) کے قائد محمد نواز شریف کی جانب سے بڑا فیصلہ کیا گیا ہے۔

انہوں نے کہا کہ قائدِ محمد نوازشریف نے اپنی صدارت میں لندن میں منعقدہ پارٹی قیادت کے اہم مشاورتی اجلاس میں اعلان کرتے ہوئے پارٹی راہنماؤں اور کارکنان کو پنجاب میں انتخابات کی تیاری کی ہدایت جاری کر دی ہے۔

قائد نوازشریف کی پارٹی صدر محمد شہباز شریف کو پارلیمانی بورڈ قائم کرنے کی ہدایت کر دی

Advertisement

پورے جذبے، اعتماد اور بھرپور تیاری اور قوت سے آگے بڑھیں: نواز شریف کی ہدایت
انشاءاللہ فتح پاکستان مسلم لیگ ن کی ہو گی -نواز شریف

— Marriyum Aurangzeb (@Marriyum_A) January 14, 2023

ان کا کہنا تھا کہ قائد نوازشریف نے پارٹی صدر محمد شہباز شریف کو پارلیمانی بورڈ قائم کرنے اور پورے جذبے، اعتماد اور بھرپور تیاری اور قوت سے آگے بڑھنے کی ہدایت بھی دی۔

وفاقی وزیر اطلاعات مریم اورنگزیب نے مزید کہا کہ اس موقع پر نواز شریف نے کہا کہ انشاءاللہ فتح پاکستان مسلم لیگ ن کی ہوگی۔