وزیر اعظم محمد شہباز شریف جنیوا میں  ڈونرز کانفرنس میں شرکت کے بعد وطن واپسی آرہے ہیں، جس کے بعد وزیر اعظم توانائی سے متعلق جائزہ اجلاس کی صدارت کریں گے۔

ذرائع نے بتایا کہ وزیر اعظم محمد شہباز شریف نے وزیر اعظم ہاؤس میں توانائی سے متعلق جائزہ اجلاس طلب کرلیا، جس میں وفاقی حکومت کے توانائی بچت پلان پر عمل درآمد کا جائزہ لیا جائے گا۔

ذرائع کے مطابق توانائی بچت پلان پر تاحال عمل درآمد کیوں نہ ہوسکا، متعلقہ وزارتوں سے تفصیلات طلب کرلی گئی ہیں۔

ذرائع کا کہنا ہے کہ اجلاس میں پاور اور پیٹرولیم ڈویژنز کی جانب سے وزیر اعظم کو بریفنگ بھی دی جائے گی۔

واضح رہے کہ چند روز قبل وزیر اعظم محمد شہباز شریف اسلام آباد سے جنیوا روانہ ہوئے تھے، جہاں انہوں نے اقوام متحدہ کے سیکرٹری جنرل کے ہمراہ لچکدار پاکستان پر بین الاقوامی کانفرنس کی مشترکہ میزبانی کی تھی۔

وزیر اعظم شہباز شریف کے ساتھ اعلیٰ سطح کا حکومتی وفد بھی روانہ ہوا تھا جن میں وزیر خارجہ بلاول بھٹو زرداری، شیری رحمان، وزیر خزانہ اسحاق ڈار اور وزیر اطلاعات مریم اورنگزیب شامل تھیں۔

یاد رہے کہ وزیر اعظم نے جنیوا کانفرنس میں سیلاب متاثرین کا مقدمہ اور ان کی بحالی کے لیے کیے گئے اقدامات سے دنیا کو آگاہ کیا تھا۔

وزیراعظم 12 سے 13 جنوری تک یو اے ای کا دورہ کریں گے

دوسری جانب وزیراعظم شہباز شریف 12 سے 13 جنوری تک یو اے ای کا دورہ کریں گے۔

متحدہ عرب امارات کے صدر شیخ محمد بن زید النہیان کی دعوت پر وزیراعظم شہباز شریف 12 سے 13 جنوری تک یو اے ای کا دورہ کریں گے۔

جاری کردہ اعلامیے کے مطابق وزیراعظم شہباز شریف کا یو اے ای کا یہ تیسرا دورہ ہوگا اور وزیراعظم کے ہمراہ کابینہ کے اہم ارکان سمیت اعلیٰ سطح کا وفد بھی ہوگا۔

اس موقع پر وزیراعظم متحدہ عرب امارات کے صدر سے ملاقات کریں گے جبکہ دونوں ممالک کے درمیان اقتصادی، تجارتی تعلقات کے فروغ اور پاکستانی افرادی قوت سے متعلق امور بھی زیر غور آئیں گے۔

یہ بھی پڑھیں: جنیوا میں سیلاب متاثرین کا مقدمہ دنیا کے سامنے رکھوں گا، وزیر اعظم

دونوں رہنما باہمی دلچسپی کے متعدد علاقائی اور عالمی امور پر بھی تبادلہ خیال کریں گے۔

وزیر اعظم متحدہ عرب امارات کے وزیر اعظم، نائب صدر اور دبئی کے حکمران شیخ محمد بن راشد المکتوم سے بھی ملاقات کریں گے جبکہ وزیراعظم اماراتی تاجروں اور سرمایہ کاروں سے بھی ملاقاتیں کریں گے۔