پنجاب میں وزیراعلیٰ کا اسمبلی تحلیل کرنے کے معاملے پر پی ڈی ایم جماعتوں میں ٹیلی فونک رابطے تیز ہوگئے ہیں۔

چیئرمین پی ٹی آئی عمران خان کے یارکر پر پی ڈی ایم کلین بولڈ ہوگئی، کپتان نے اسمبلیاں کیا توڑیں، تیرہ جماعتی اتحاد کی رہی سہی آس بھی ٹوٹ گئی، فون بجنے لگے، رابطے بڑھنے لگے۔

نواز شریف کا وزیراعظم شہباز شریف کو ٹیلی فون

ذرائع کے مطابق مسلم لیگ ن کے قائد نواز شریف کا وزیراعظم شہباز شریف سے ٹیلی فونک رابطہ ہوا جس میں پنجاب کی سیاسی صورتحال پر تفصیلی تبادلہ خیال کیا گیا اور اسمبلی تحلیل ہونے پر ممکنہ پیدا ہونے والی صورتحال پر بھی بات چیت ہوئی۔

ذرائع کا کہنا ہے کہ اس حوالے سے وزیراعظم شہباز شریف گورنر پنجاب بلیغ الرحمان کو کچھ اہم ہدایات دیں گے۔

ذرائع نے بتایا کہ رابطے کے دوران اگر مارچ یا اپریل میں عام انتخابات ہوں تو ن لیگ کی حکمت عملی کیا ہوگی؟ اور کتنی پوزیشن مضبوط بنائی جاسکتی ہے؟ تمام پہلوؤں پر بھی گفتگو ہوئی۔

وزیر اعظم کا آصف زرداری سے ٹیلی فونک رابطہ

دوسری جانب پنجاب کی صورتحال کے معاملے پر وزیر اعظم متحرک ہوگئے ہیں، وزیر اعظم شہباز شریف نے پیپلز پارٹی کے شریک چیئرمین آصف زرداری سے ٹیلی فونک رابطہ کیا۔

ذرائع کے مطابق وزیر اعظم اور آصف زرداری کے درمیان پنجاب کی سیاسی صورتحال پر تبادلہ خیال ہوا اور پنجاب میں آئین کے مطابق چلنے پر اتفاق کیا گیا۔

ذرائع نے مزید بتایا کہ وزیر اعظم شہباز شریف نے قائد مسلم لیگ نواز شریف سے بھی رابطہ کیا تھا۔

احسن اقبال کی نواز شریف سے ملاقات

علاوہ ازیں مسلم لیگ ن کے سیکرٹری جنرل احسن اقبال کی مسلم لیگ ن کے قائد نواز شریف اور سینیر نائب صدر مریم نواز سے لندن میں ملاقات ہوئی جس میں ملکی مجموعی معاشی اور سیاسی صورتحال پر تبادلہ خیال کیا گیا۔

اس حوالے سے ذرائع نے بتایا کہ ملاقات میں پنجاب کی موجودہ صورت حال اور پارٹی کے تنظیمی ڈھانچے پر بھی گفتگو کی گئی۔

ذرائع کے مطابق ملاقات میں نواز شریف نے احسن اقبال کو انٹرا پارٹی انتخابات کی تیاریوں کا حکم دے دیا۔

ذرائع کا کہنا تھا کہ نواز شریف نے پنجاب میں ن لیگ کو فعال کرنے اور پارٹی کو فعال بنانے کیلئے غیر معمولی اقدامات کی ہدایت دیتے ہوئے کہا کہ اب ہمیں بھی روایتی طریقوں سے ہٹ کر پالیسی اپنانا ہوگی۔

یہ بھی پڑھیں؛پرویز الہٰی نے پنجاب اسمبلی توڑنےکی سمری پر دستخط کردیے

ذرائع نے بتایا کہ مریم نواز نے پنجاب میں پارٹی میں بڑی تبدیلیوں کا فیصلہ کرلیا۔

ذرائع کے مطابق ملاقات میں احسن اقبال نے پارٹی امور پر تفصیلی بریفنگ دی اور درخواست کی کہ نواز شریف اور مریم نواز سے جلد وطن واپس آجائیں۔