پاکستان مسلم لیگ (ن) کے صدر اور وزیراعظم شہباز شریف نے پارٹی کے بڑے تنظیمی فیصلے کا اعلان کر دیا ہے۔

اس حوالے سے پاکستان مسلم لیگ (ن) کی ترجمان مریم اورنگزیب نے اپنے ٹوئٹر پر بتایا کہ شہباز شریف نے مریم نواز شریف کو پاکستان مسلم لیگ (ن) کی سینئر نائب صدر مقرر کردیا جس کا نوٹیفکیشن بھی جاری کر دیا گیا ہے۔

نوٹیفیکیشن پاکستان مسلم لیگ (ن) کے صدر شہباز شریف کے دستخطوں سے جاری ہوا
شہباز شریف نے @MaryamNSharif مریم نواز شریف کو پارٹی کا 'چیف آرگنائزر' بھی مقرر کر دیاپارٹی کی تنظیم نو کی ذمہ داری مریم نواز شریف کو سونپ دی گئی مریم نواز شریف تمام سطحوں پر پارٹی کو 'ری-آرگنائز' کریں گی pic.twitter.com/BfKv1TIeGg

— Marriyum Aurangzeb (@Marriyum_A) January 3, 2023

وفاقی وزیر اطلاعات مریم اورنگزیب نے بتایا کہ نوٹیفکیشن پاکستان مسلم لیگ (ن) کے صدر شہباز شریف کے دستخطوں سے جاری ہوا، انہوں نے مریم نواز شریف کو پارٹی کا ‘چیف آرگنائزر’ بھی مقرر کر دیا۔

ن لیگ کی ترجمان نے مزید کہا کہ پارٹی کی تنظیم نو کی ذمہ داری مریم نواز شریف کو سونپ دی گئی، اب مریم نواز تمام سطحوں پر پارٹی کو “ری آرگنائز” کریں گی۔

مریم نواز کو ن لیگ کی چیف آرگنائزر بنانے کی وجہ سامنے آگئی

دوسری جانب مریم نواز شریف کو مسلم لیگ ن کی چیف آرگنائزر بنانے کی وجہ سامنے آگئی ہے۔

ذرائع ن لیگ نے بتایا کہ نواز شریف کی مداخلت پر مریم نواز کو سینئر نائب صدر اور چیف آرگنائزر بنایا گیا ہے، کیونکہ شہباز شریف پارٹی امور چلانے اور پارٹی کو ری آرگنائز کرنے میں مکمل طورپر ناکام رہے۔

ذرائع کے مطابق نواز شریف نے متعدد بار شہباز شریف کو پارٹی امور پر توجہ دینے کی ہدایت کی لیکن وہ ناکام رہے، انہوں نے مریم نواز کو پارٹی کی ری آرگنائز کی ذمہ داری اپنی ناکامی کی وجہ سے سونپی۔

ذرائع کا کہنا تھا کہ مریم نواز نے متعدد بار نواز شریف کو شکایت کی کہ پارٹی عہدہ نہ ہونے کی وجہ سے سینئر لوگ ان کی بات کو نظر انداز کرتے ہیں۔

ذرائع ن لیگ نے مزید بتایا کہ مریم نواز نے چیف آرگنائزر بنتے ہی ایکٹیو خواتین سے پارٹی کو متحرک کرنے کے لئے تجاویز مانگ لیں جبکہ مریم نواز کے جلد وطن واپس آنے کا بھی امکان ہے۔