پشاور:  نگران وزیراعلیٰ خیبرپختونخوا محمد اعظم خان کی وزیراعلیٰ ہاؤس میں کابینہ اراکین سے ملاقات ہوئی جس میں انتخابات اور امن و امان کی صورتحال پر بحث کی گئی۔

تفصیلات کے مطابق وزیراعلیٰ خیبر پختونخوا محمد اعظم خان نے 15 رکنی نگران وزراء کے حلف اٹھانے پر کابینہ اراکین کو مبارکباد دی۔

نگران وزیراعلیٰ نے کابینہ اراکین کے علاوہ دیگر اہم شخصیات سے بھی ملاقات کی جس میں  اہم امور پر غور کیا گیا۔

خیال رہے کہ نگران وزراء کے قلمدان سونپ دیے جائیں گے، قلمدان ملنے کے بعد وزراء اپنی ذمہ داریاں سنبھال لیں گے۔

دوسری جانب ذرائع نے بتایا کہ نگران صوبائی کابینہ کے ایک اور رکن کی حلف برداری آج گورنر ہاؤس خیبرپختونخوا میں ہو گی۔

ذرائع کے مطابق منظور خان آفریدی بحثیت نگران صوبائی وزیر اپنے عہدے کا حلف اٹھائیں گے۔

یاد رہے کہ گزشتہ روز خیبر پختونخوا کے نگراں سیٹ اپ کے لئے 14نگراں وزراء نے حلف اٹھایا جبکہ منظور آفریدی ملک سے باہر ہیں جس وجہ سے حلف نہیں اٹھایا، منطور آفریدی واپس آنے کے بعد حلف اٹھائیں گے۔ منظور آفریدی کے حلف اٹھانے کے بعد نگران کابینہ کو محکموں تفویض کیے جانے کا امکان ہے۔

خیبرپختونخوا کی 15 رکنی نگران کابینہ نے حلف اٹھا لیا

گزشتہ روز خیبر پختونخوا کے نگران وزیر اعلیٰ محمد اعظم خان کی کابینہ تشکیل دے دی گئی جس کا اعلامیہ بھی جاری کر دیا گیا تھا۔

 جاری کردہ اعلامیے کے مطابق 15 رکنی نگران کابینہ نے حلف اٹھا لیا ہے۔

گورنر غلام علی نے نگران وزراء سے حلف لیا، حلف برداری کی تقریب گورنر ہاؤس میں ہوئی۔

ضرور پڑھیں؛ پنجاب کی نگران کابینہ نے حلف اٹھا لیا، محسن نقوی کی مبارکباد

کابینہ میں عبدالحلیم قصوریہ، سید مسعود شاہ، حامد شاہ، ساول نذیر ایڈووکیٹ، بخت نواز، سابق صنعتکار فضل الہیٰ، عدنان جلیل، شفیع اللہ خان، شاہد خان خٹک، حاجی غفران، خوشدل خان ملک، تاج محمد آفریدی، محمد علی شاہ، جسٹس ریٹائرڈ ارشاد قیصر اور منظور خان آفریدی شامل ہیں۔

واضح رہے کہ کابینہ میں نگران وزیر اعلیٰ اعظم کے سمدھی بھی شامل ہیں۔