بول نیوزکے سینئر اینکر پرسن ارشد شریف قتل کیس میں خصوصی تحقیقاتی ٹیم کو فنڈز کے اجراء کی درخواست مسترد کردی گئی ۔

تفصیلات کے مطابق ارشد شریف قتل کیس کی تحقیقات کے لئے بنائی جانے والے تحقیقاتی کمیٹی نے وزارت داخلہ سے دبئی اور کینیا کے دورے کے لیے فنڈز جاری کرنے کی درخواست کی تھی ۔

اس حوالے سے ذرائع کا کہنا ہے کہ دونوں ممالک کے دورے کے لیے ایک کروڑ روپے کی درخواست کو وزارت داخلہ نے درخواست کو مسترد کردیا ہے۔

یہ بھی پڑھیں: ارشد شریف قتل کیس، مزید 3 گواہوں کی شہادتیں قلمبند

ذرائع کاکہنا ہے کہ درخواست مسترد کرتے ہوئے غیر ملکی دوروں پر وفاقی حکومت کی جانب سے عائد پابندی کا حوالہ دیا گیا ہے اور کہا گیا ہے کہ پابندی کی وجہ سے وزارت خزانہ نے اس دورے کے لیے فنڈز کی منظوری نہیں دی ۔

وزارت داخلہ نے اپنے جواب میں کہا ہے کہ فنڈز صرف کابینہ ڈویژن کی منظوری کے بعد وزارت خزانہ کی جانب سے جاری کیے جا سکتے ہیں تاہم ٹیم کو پولیس بجٹ سے فنڈز مختص کرنے کا مشورہ دے دیا۔

علاوہ ازیں کینیا کے سفارت خانے نے قتل کیس سے جڑے پولیس افسران کے ساتھ ملاقاتوں کا اہتمام کرنے کی درخواست مسترد کر دی ہے ۔

خیال رہے کہ جے آئی ٹی نے جنوری کے پہلے ہفتے میں کینیا کا دورہ کرنے کا منصوبہ بنایا تھا ۔

ضرور پڑھیں؛ ارشد شریف قتل کیس؛ جے آئی ٹی کے پوسٹ مارٹم کرنے والی ٹیم سے سوالات

دوسری جانب ترجمان اسلام آباد کیپیٹل پولیس کا کہنا ہے کہ ایس جے آئی ٹی کے بیرون ملک جانے کے تمام انتظامات مکمل ہیں جبکہ فنڈز کا اجراء اسلام آباد کیپیٹل پولیس نے کردیا ہے۔

ترجمان کا کہنا تھا کہ فنڈز کے اجراء کی منظوری دے دی گئی ہے اور ایس جے آئی ٹی کینین حکام سے رابطے میں ہے۔