خیبرپختونخوا کے ضلع کوہاٹ میں واقع تاندہ ڈیم میں پیش آنے والے کشتی حادثے کا مقدمہ درج کرلیا گیا ہے جبکہ محکمہ تفتیش کی جانب سے تحقیقات کا آغاز بھی کردیا گیا ہے۔

تفصیلات کے مطابق گزشتہ روز خیبر پختونخوا کے علاقے کوہاٹ میں افسوسناک واقعہ پیش آیا جس دوران سیر و تفریح کی غرض سے آنے والے طلباء کی کشتی الٹنے سے 11 بچے جان سے گئے تاہم کشتی میں مدرسہ کے 30 طلباء سوارتھے۔

پولیس نے بتایا ہے کہ کوہاٹ تاندہ ڈیم میں کشتی ڈوبنے کے واقعے کا مقدمہ کشتی کے مالک اور محکمہ ایری گیشن کے تین افسران کے خلاف تھانہ محمد ریاض شہید میں درج کر لیا گیا ہے جبکہ تحقیقات شروع کردی گئیں ہیں۔

مقدمے کے متن میں بتایا گیا ہے کہ وقوعہ مقدمے میں نامزد ملزمان کی مجرمانہ غفلت و لاپرواہی اور غیر ذمہ داری کے سبب رونما ہوا

دوسری جانب مقامی افراد کے مطابق حادثہ  اوور لوڈنگ اور حفاظتی اقدامات نہ ہونے کے باعث پیش آیا۔

خیال رہے کہ گزشتہ روز کوہاٹ تاندہ ڈیم میں کشتی ڈوبنے سے مدرسے کے 30 طلباء پانی میں ڈوب گئے تھے جبکہ امدادی ٹیموں اور غوتا خوروں نے ڈوبنے والے 17 طلبہ کو پانی سے باہر نکال کر اسپتال منتقل کر دیا جس میں سے 11 بچے جاں بحق ہو گئے ہیں۔

کوہاٹ کے علاقہ میر باش کھیل کے مدرسے کے طلباء جو سیر کی غرض سے تاندا ڈیم آئے تھے،  کشتی جب جیل کے وسط تک پہنچی توزیادہ سوار طلباء کی وجہ سے الٹ گئی جس کے باعث کشتی میں سوار تمام افراد پانی میں ڈوب گئے ڈوبنے والے مدرسے کے 30 طلباء کا تعلق کوہاٹ کے علاقہ میںرباش خیل سے ہے۔

واضح رہے کہ 14 بچوں کو نکالنے کے لیے ریسکیو آپریشن شروع کر دیا گیا ہے۔

شہید بچوں کی نماز جنازہ

تاندہ ڈیم سانحہ شہید بچوں کی نماز جنازہ ادا کردی گئی ہے جس میں شہر بھر سے لوگوں نے شرکت  کو یقینی بنایا۔

نماز جنازہ اجتماعی  طور پر آبائی گاؤں سلیمان تالاب میں ادا کی گئی بعدازاں بچوں کو سپرد خاک کردیا گیا۔