لاہور: جنوبی چھاٶنی کے علاقے میں 13 سالہ گریلو ملازمہ مریم پر بہیمانہ تشدد کا واقعہ پیش آیا ہے جس کے ملزمان کے خلاف مقدمہ درج کرلیا گیا ہے۔

تفصیلات کے مطابق جنوبی چھاؤنی میں 13 سالہ گھریلو ملازمہ کو تشدد کر کے جلا نے کا واقعہ پیش آیا ہے جو کہ افشاں نامی عورت کے گھر ملازمہ تھی۔

اس حوالے سے پولیس حکام نے بتایا کہ والدین بچی کو ملنے پہنچے مگر مالکان بیٹی کو ملوانے پر ٹال مٹول کرنے لگے جس کے نتیجے میں سکینہ بی بی شوہر کے ہمراہ بیٹی کو ملنے پہنچی اور نہ ملوانے پر شور مچایا تو مالکان گھر کے اندر لے گئے جہاں پر مریم بدترین تشدد زدہ حالت میں ملی۔

یہ بھی پڑھیں: پتوکی میں کمسن گھریلو ملازمہ پر تشدد، زیادتی اور قتل کا معاملہ

اس حوالے سے پولیس حکام کا کہنا ہے کہ مریم پر مالکن افشاں بی بی نے بھائی ندیم اور اکمل کے ساتھ مل کر تشدد کیا تاہم زخمی کو طبی امداد کے لیے فوری اسپتال منتقل کر دیا گیا ہے۔

پولیس کا کہنا تھا کہ متاثرہ بچی شبلی ٹاؤن کی رہائشی ہے 9 ماہ سے ملازمت پر تھی تاہم بچی معذور ہوچکی ہے،اس حالت میں بھی کام کراتے رہے ہیں۔

پولیس نے بتایا کہ بچی کی والدہ کی مدعیت میں 03 نامزد ملزمان ندیم، اکمل اور افشاں بی بی کے خلاف فوری مقدمہ درج کر لیا گیا ہے جبکہ ملزمان کی گرفتاری کے لیے ٹیم تشکیل دے کر چھاپے مارے جا رہے ہیں ۔

دوسری جانب سی سی پی او لاہور بلال صدیق کمیانہ نے واقعے کا نوٹس لیتے ہوئے ایس پی انوسٹی گیشن کینٹ سے رپورٹ طلب کرلی ہے اور تشدد میں ملوث مالکان کی فوری گرفتاری کا حکم بھی دیا ہے۔

انہوں نے ہدایات جاری کی ہیں کہ بچوں خواتین پر تشدد ہرگز برداشت نہیں، ملزمان کو کیفرکردار تک پہنچائیں گے اور ملزمان کی گرفتاری کے لئے تمام وسائل بروئے کار لائیں۔