سندھ کے وزیرِ محنت سعید غنی کا کہنا ہے کہ 15 جنوری کو بلدیاتی انتخابات کراچی اور حیدرآباد میں ہر صورت ہوں گے۔

پاکستان پیپلز پارٹی کراچی ڈویژن کا اہم اجلاس ڈویژن کے صدر و صوبائی وزیر سعید غنی کی زیر صدارت منعقد ہوا جس میں 15 جنوری کو کراچی میں ہونے والے بلدیاتی انتخابات کے حوالے سے تفصیلی تبادلہ خیال کیا گیا۔

ہمیں بلدیاتی انتخابات کی مہم کا آغاز شروع کر دینا چاہیے

صوبائی وزیر سعید غنی نے اجلاس میں گفتگو کرتے ہوئے کہا کہ کراچی اور حیدر آباد میں بلدیاتی انتخابات ہر صورت ہوں گے، ہمیں بلدیاتی انتخابات کی بھرپور مہم کا آغاز ایک بار پھر زور و شور سے شروع کر دینا چاہیے۔

انہوں نے کہا کہ چیئرمین بلاول بھٹو زرداری، وزیر اعلیٰ سندھ اور پیپلز پارٹی 15 جنوری کو کراچی میں بلدیاتی انتخابات ہر صورت چاہتے ہیں۔

سعید غنی نے کا کہنا تھا کہ جن جن ڈسٹرکٹ میں پارٹی کے مقابلے میں کوئی بھی پارٹی کا کارکن یا ذمہ دار پارٹی امیدوار کے خلاف الیکشن یا کسی اور کی مہم چلا رہا ہوگا اس کے خلاف سخت پارٹی کی جانب سے تادیبی کارروائی آئندہ 48 گھنٹوں میں شروع کردی جائے گی۔

پیپلزپارٹی سندھ کے جنرل سیکرٹری سینیٹر وقار مہدی

دوسری جانب پیپلز پارٹی سندھ کے جنرل سیکرٹری سینیٹر وقار مہدی نے کہا کہ پیپلز پارٹی نے کراچی کی تمام یونین کونسلز اور وارڈز کی سطح پر اپنے چیئرمین، وائس چیئرمین اور کونسلرز کے امیدوار کھڑے کیے ہیں۔

وقار مہدی نے مزید کہا کہ پیپلز پارٹی اس شہر اور صوبے کی واحد سیاسی جماعت ہے جس نے بلا کسی سیاسی، مذہبی اور لسانی تقسیم کے اس شہر میں ترقیاتی کاموں کا جھال بچھایا ہے۔

علاوہ ازیں جاوید ناگوری نے کہا کہ آج اگر ہم یہ کہتے ہیں کہ کراچی سب کا ہے تو اس کا سبب یہی ہے کہ ہم اس شہر کو مکمل اون کرتے ہیں۔

اجلاس میں پیپلز پارٹی سندھ کے جنرل سیکرٹری سینیٹر وقار مہدی ، کراچی ڈویژن کے جنرل سیکرٹری جاوید ناگوری، مرزا مقبول، سردار شاہ، نجمی عالم، شہلا رضا، محمد آصف خان، شکیل چوہدری، خواتین ونگ کی صدر شاہدہ رحمانی، تمام ڈسٹرکٹ کے صدور، پیپلز یوتھ، پیپلز لیبر بیورو، پیپلز منارٹی ونگ، پیپلز لائرز فورم ، پیپلز اسٹوڈنس فیڈریشن سمیت تمام ذیلی تنظیموں کے صدور و دیگر بھی موجود تھے۔