قائد مسلم لیگ ن نواز شریف کی جانب سے ایک ماہ میں انٹرا پارٹی انتخابات کی ہدایت کر دی گئی ہے۔

اس حوالے سے ذرائع کا کہنا ہے کہ ن لیگ کے انٹرا پارٹی الیکشن کے لئے آئین میں تبدیلی کے لئے احسن اقبال نے کام شروع کر دیا ہے جس کے تحت نواز شریف کو تاحیات پارٹی قائد منتخب کیا جائے گا۔

خیال رہے کہ صدر ن لیگ شہباز شریف نے نواز شریف کی خواہش پر انٹرا پارٹی انتخابات کے بغیر پارٹی آئین کے تحت مریم نواز کو مقرر کیا ہے۔

اس سے متعلق ذرائع نے بتایا کہ پارٹی آئین کے تحت سینئیر نائب صدر پارٹی کا قائم مقام صدر بن سکتا ہے اور عہدہ ملنے کے بعد  مریم نواز کے پارٹی صدر منتخب ہونے کی راہ ہموار ہوگئی ہیں۔

یہ بھی پڑھیں: ن لیگ کے انٹرا پارٹی الیکشن کی تاریخ کا اعلان ہوگیا

ذرائع نے کہا ہے کہ نواز شریف نے مریم نواز کو پارٹی میں اہم تنظیمی تبدیلیوں کا ٹاسک دیا ہے اور بطور چیف آرگنائزر مریم نواز پارٹی میں تنظیمی تبدیلیوں کیلئے صدارتی اختیارات استعمال کر سکیں گی۔

دوسری جانب متعدد سینئیر پارٹی رہنماؤں کو مریم نواز کے لا محدود اختیارات پر تشویش کا اظہار کیا ہے تاہم  مریم نواز وطن واپسی کے بعد  پارٹی کے تنظیمی ڈھانچے میں تبدیلی کے لیے اہم فیصلے متوقع ہیں۔

انٹرا پارٹی انتخابات کرانے کے لیے آخری ڈیڈ لائن

الیکشن کمیشن آف پاکستان (ای سی پی) نے پاکستان مسلم لیگ نواز (پی ایم ایل این) کو انٹرا پارٹی انتخابات کرانے کے لیے آخری ڈیڈ لائن دے دی ہے۔

چیف الیکشن کمشنر (سی ای سی) سکندر سلطان راجہ کی سربراہی میں تین رکنی کمیشن نے ای سی پی میں سیاسی جماعتوں کے انٹرا پارٹی انتخابات سے متعلق سماعت کی۔

ای سی پی نے مسلم لیگ ن کو پارٹی انتخابات کرانے کی حتمی ڈیڈ لائن دیتے ہوئے واضح کیا کہ اگر مقررہ مدت میں انتخابات نہ ہوئے تو پارٹی کا انتخابی نشان واپس لے لیا جائے گا۔

سی ای سی نے حیرت کا اظہار کیا کہ جو پارٹی اندرونی انتخابات نہیں کروا سکی وہ عام انتخابات کیسے کراتی ہے۔

یہ بھی پڑھیں: الیکشن کمیشن نے چوہدری شجاعت حسین کو پارٹی سربراہ برقرار رکھنے کا حکم دیدیا