کراچی: پاکستان تحریک انصاف (پی ٹی آئی) کے سندھ اسمبلی میں پارلیمانی لیڈر خرم شیر زمان کا کہنا ہے کہ حکومت کے فیصلے کیخلاف ہم تاجر برادری کیساتھ کھڑے ہیں۔

پی ٹی آئی رہنما خرم شیر زمان نے تاجر رہنماؤں عتیق میر، جمیل پراچہ، شرجیل گوپلانی کے ہمراہ پریس کانفرنس کرتے ہوئے کہا کہ کراچی کی تمام تاجر برادری کی آواز ہے جو آج ہمارے ساتھ موجود ہیں۔

ہم ان کے فیصلے کو مسترد کرتے ہیں

خرم شیر زمان نے کہا کہ حکومت کی جانب سے جو مارکیٹوں کو بند کرنے کا فیصلہ کیا گیا، ہماری تفصیل سے بات ہوئی ہے، تاجر برادری نے ان کے فیصلے کو مسترد کیا ہے۔

انہوں نے کہا کہ حکومت اپنی نالائقی اور غلط فیصلوں کی وجہ سے عوام پر بار بار بوجھ ڈالتی ہے، ہم ان کے فیصلے کو مسترد کرتے ہیں، ہم تاجر برادری کے ساتھ کھڑے ہیں، پنجاب اور کے پی کے نے بھی ان کے فیصلے کو مسترد کر دیا ہے۔

حکومت کے فیصلے معیشت سے دشمنی کے ہیں

پی ٹی آئی رہنما نے کہا کہ کاروبار لوگوں کے بند ہیں، ان عوام دشمن فیصلے مصیبت بن کر عوام پر اترے ہیں، ان کا کہنا تھا کہ معیشت کو بہتر کریں گے۔

خرم شیر زمان نے کہا کہ آج کی حکومت جس طرح فیصلے کررہی ہے، یہ ملک دشمنی کی طرف جارہے ہیں، یہ اپنے غیر ملکی دوروں کو کم کر کے پیسے بچائیں، ان کے گھومنے سے پیسے خرچ ہورہے ہیں۔

انہوں نے مزید کہا کہ کورونا کے جو عمران خان نے فیصلے کیے تھے، وہ پوری دنیا میں موجود ہیں، حکومت سندھ نے کہا لاک ڈاؤن کریں گے، لیکن ہم نے اسمارٹ لاک ڈاؤن کیا۔

تاجر رہنما جمیل پراچہ کی گفتگو

دوسری جانب تاجر رہنما جمیل پراچہ نے گفتگو کرتے ہوئے کہا کہ حکومت کی طرف سے کاروبار پر کاری ضرب لگائی جارہی ہے، حکومت نے ہمارا مشورہ سنے بغیر فیصلہ تھوپ دیا، ہم اس فیصلے کو مسترد کرتے ہیں۔

مزید پڑھیں: توانائی بچت پلان کی منظوری، کاروباری مراکز اور شادی ہالز جلد بند کرنے کا فیصلہ

انہوں نے مزید کہا کہ یہ ہمارے سیزن کا وقت ہے، حکومت اس وقت جانتی ہے معیشت وینٹی لیٹر پر ہے، یہ 67 فیصد ریونیو دینے والا شہر ہے۔

شرجیل گوپلانی کی گفتگو

اس کے علاوہ تاجر رہنما شرجیل گوپلانی نے بھی میڈیا سے گفتگو کرتے ہوئے کہا کہ پورٹ میں جو کینٹر روکے ہوئے ہیں، اس کے ڈیمریج پر کروڑوں روپے باہر جارہے ہیں۔

ملک بینک کرپٹ ہوچکا ہے

شرجیل گوپلانی نے کہا کہ اسٹیٹ بینک ہمیں ڈالر نہیں دے رہی، ہمارے اکاؤنٹس سے پیسے لیے جارہے ہیں، امپورٹرز کے اکاؤنٹس سے ناجائز طریقے سے پیسے لیے جارہے ہیں۔

تاجر رہنما نے مزید کہا کہ اس وقت ملک بینک کرپٹ ہوچکا ہے، انڈسٹری بند ہوگئی ہے، ہم آج بھی روزگار مہیا کررہے ہیں ہم پر یہ فیصلہ صادر نہ کیا جائے، یہ پاکستان کو بننا ریپبلک بنانا چاہتے ہیں۔

وقاص عظیم کی گفتگو

اس کے علاوہ تاجر رہنما وقاص عظیم نے بھی گفتگو کرتے ہوئے کہا کہ کورونا کے اثرات سے ابھی کسی طرح باہر نکلے ہیں، مجھے لوگوں کو فارغ کرنا پڑے گا، 5 سے 6 لاکھ لوگ فارغ ہو جائیں گے۔

انہوں نے مزید کہا کہ حکومت کا ہم کسی قسم کا فیصلہ نہیں مانتے ہیں، جس جادوگر نے آپ کو سکھایا ہے، اس سے بھی مذاکرہ کرنا ہے۔