پشاور: پاکستان تحریک انصاف (پی ٹی آئی) نے قومی  اور صوبائی اسمبلی کی نشستوں پر انتخابات کے لئے تیاریاں شروع کردی ہیں۔

اس حوالے سے پی ٹی آئی پشاور ریجن کے جنرل سیکرٹری سابق صوبائی وزیر کامران بنگش نے بول نیوز سے گفتگو کرتے ہوئے کہا کہ اسمبلی کی تحلیل سے پہلے قیادت نے ہدایات دی تھیں کہ اپنے حلقوں میں چلے جائیں، تمام حلقوں میں ہمارے عوامی رابطے بحال ہو چکے ہیں۔

انہوں نے کہا کہ پشاور ریجن کے 37حلقوں کے لئے ورکنگ مکمل کر لی گئی ہے، ان حلقوں کے حوالے سے ریجنل صدر عاطف خان کے ساتھ مشاورت مکمل ہو چکی ہے۔

کامران بنگش نے کہا کہ اب ہم صوبائی پارلیمانی بورڈ کو اپنی سفارشات بھیجیں گے، جیسے ہی خان صاحب فائنل  فیصلہ کریں گے، ہم میدان میں اتریں گے۔

پی ٹی آئی رہنما نے کہا کہ پہلے سے زیادہ قوت کے ساتھ آئیں گے، امپورٹڈ حکومت کو الیکشن سے بھاگنے نہیں دیں گے۔

انکا کہنا ہے کہ مارچ میں قومی اسمبلی کے ضمنی انتخابات میں عمران خان تمام حلقوں سے الیکشن لڑیں گے، جن جن حلقوں میں الیکشن ہو رہے ہیں ان کے لئے ٹیمیں تشکیل دی جا چکی ہیں۔

کامران بنگش نے مزید کہا کہ متعلقہ اضلاع کی سرکردہ قیادت نے تیاریاں کر لی ہیں اور عمران خان وائٹ واش کریں گے۔

پی ٹی آئی خیبرپختونخوا کی صوبائی پارلیمانی بورڈ کا اجلاس آج طلب

دوسری جانب ترجمان پی ٹی آئی خیبرپختونخوا شوکت یوسفزئی نے اپنے جاری کردہ بیان میں بتایا کہ پی ٹی آئی خیبر پختونخوا نے صوبائی پارلیمانی بورڈ کا اجلاس آج  طلب کرلیا ہے۔

انہوں نے کہا کہ اجلاس کی صدارت صوبائی صدر پرویز خٹک کریں گے، جس میں نئے آنے والے انتخابات کی تیاریوں سے متعلق گفتگو کی جائے گی۔

شوکت یوسفزئی نے کہا کہ اجلاس میں نگران حکومت میں پی ڈی ایم کے وزراء کی شمولیت، معاشی بدحالی سے متعلق بھی تبادلہ خیال ہوگا۔

مزید پڑھیں؛ پی ٹی آئی کا ضمنی انتخابات میں حصہ لینے کا اعلان، عمران خان 33 نشستوں پر امیدوار ہوں گے

انکا کہنا تھا کہ مہنگائی، پیٹرولیم مصنوعات کی قیمتوں میں اضافہ پر بات چیت بھی اجلاس کے ایجنڈے میں شامل ہے اور اس موقع پر پی ٹی آئی لیڈروں کے خلاف انتقامی کارروائیوں سے متعلق لائحہ عمل تیار ہوگا۔

پی ٹی آئی رہنما شوکت یوسفزئی نے مزید کہا کہ محمود خان، اسد قیصر، شاہ فرمان،  لی امین گنڈاپور سمیت دیگر رہنما اجلاس میں شرکت کریںگے۔