شہباز شریف نے کہا ہے کہ حکومت نے توانائی کی بچت کے پلان پر عملدرآمد کا آغاز کردیا۔

تفصیلات کے مطابق وزیراعظم شہباز شریف نے سماجی رابطے کی ویب سائٹ ٹویٹر پر اپنے ایک پیغام میں کہا کہ اپنے وسائل کو مدِنظر رکھتے ہوئے ہم سب پاکستانیوں کو توانائی کی بچت اوران کا مؤثراور بہتر استعمال یقینی بنانا ہے۔

اپنے وسائل کو مدِنظر رکھتے ہوئے ہم سب پاکستانیوں کوتوانائی کی بچت اوران کامؤثراور بہتراستعمال یقینی بنانا ہے۔ آج حکومت نے تفصیلی مشاورت سےتوانائی کی بچت کےپلان پر عملدرآمد کا آغاز کردیا ہے۔ہمیں توانائی بچت پلان کو کامیاب بنانے کیلئے زندگی کے ہر شعبے میں اپنے طرزِ عمل کو بدلنا ہوگا

— Shehbaz Sharif (@CMShehbaz) January 3, 2023

وزیراعظم شہباز شریف نے مزید کہا کہ آج حکومت نے تفصیلی مشاورت سے توانائی کی بچت کے پلان پرعملدرآمد کا آغاز کردیا ہے، ہمیں توانائی بچت پلان کو کامیاب بنانے کیلئے زندگی کے ہر شعبے میں اپنے طرزِ عمل کو بدلنا ہوگا۔

واضح رہے اس سے قبل پریس کانفرنس کرتے ہوئے وفاقی کابینہ کی جانب سے کاروباری مراکز رات 8.30 بجے اور شادی ہالز رات 10 بجے بند کرنے کا اعلان کیا گیا ہے۔

یہ بھی پڑھیں؛ دہشت گردی کے خاتمے کے لئے کوئی کسر اٹھا نہیں رکھیں گے، شہباز شریف

وفاقی کابینہ کی جانب سے توانائی بچت پلان کی منظوری دے دی گئی ہے جس کے تحت اب کاروبار اور شادی ہالز جلد بند کرنے کا فیصلہ کیا گیا ہے، اس حوالے سے وفاقی وزیر دفاع خواجہ آصف نے کہا ہے کہ توانائی بچت پلان ملک بھر میں نافذ العمل ہوگا جس سے 62 ارب روپے کی بچت ہوگی۔

انہوں نے بتایا کہ ملک بھر میں اسٹریٹ لائٹس50 فیصد آن ہوں گی جس سے 4 ارب کی بچت ہوگی جبکہ غیر مؤثر پنکھے اب فیکٹریوں میں نہیں بنائے جائیں گے اور  یکم فروری 2023 کے بعد پرانے بلب  بھی تیار نہیں کیے جائیں گے۔

انہوں نے کہا کہ سرکاری اداروں میں ایل ای ڈی بلب اورمؤثر آلات استعمال کرینگے اور تمام اداروں میں بجلی کے استعمال میں 30 فیصد کمی لائی جائے گی ۔

خواجہ آصف نے بتایا کہ گرمیوں میں 29 ہزار میگاواٹ بجلی استعمال کرتے ہیں اور سردیوں میں یہی استعمال 12 ہزار میگاواٹ پر آجاتا ہے تاہم بجلی کے استعمال کو کم کرنے کے پروگرام پر عمل کررہے ہیں۔

ان کا کہنا تھا کہ ملک میں 12ہزار میگاواٹ صرف پنکھوں کی کھپت ہے جس کی پیش نظر بجلی سے چلنے والےغیر معیاری پنکھوں پر اضافی ڈیوٹی عائد کی جائے گی۔

انہوں نے بتایا کہ گیزر میں کونیکل بیفرز کا استعمال لازمی قرار دیدیا گیا ہے، اس آلے سے گیس کا استعمال کم ہوگا اور 92ارب کی بچت ہوگی۔