وزیر اعظم شہباز شریف کے معاون خصوصی  عطا تارڑ کا کہنا ہے کہ اعتماد کا ووٹ لازمی لینا ہوگا، وزیراعلیٰ مزید نہیں بھاگ سکتے۔

مسلم لیگ ن کے رہنما عطا تارڑ نے لاہور ہائیکورٹ میں میڈیا سے گفتگو کرتے ہوئے کہا کہ وزیراعلیٰ پنجاب اعتماد کا ووٹ  لینے سے بھاگ نہیں سکتے، انکو 186 ووٹ لینے ہونگے۔

اطلاعات ہیں وزیر اعلیٰ بیرون ملک بیٹے کے پاس جانا چاہتے ہیں

انہوں نے کہا کہ اطلاعات ہیں وزیر اعلیٰ پنجاب بیرون ملک بیٹے کے پاس جانا چاہتے ہیں، وزیراعلیٰ باہر جانے سے گریز کریں، ہمیں اچھا نہیں لگتا وزیراعلیٰ کا نام نو فلائی لسٹ میں آئے، وزیراعلیٰ کی فیملی کا نام نو فلائی لسٹ میں ہے۔

عطا تارڑ نے کہا کہ پرویزالہٰی کے وکیل کے پاس کوئی قانونی دلائل نہیں، گورنر کو حق ہے وزیراعلیٰ کو اعتماد کے ووٹ کا کہہ سکتے ہیں۔

پرویز الہیٰ ووٹ لو یا گھر جاؤ

لیگی رہنما نے کہا کہ جب گورنر نے کہہ دیا ہے گورنر کو ایوان میں غلط ثابت کریں، 186 ممبران کی حمایت لیں اور گورنر کو غلط ثابت کریں، اعتماد فلور میں 186 ممبرز کی حمایت سے ہی ثابت کرنا ہوگا، ووٹ لازمی لینے ہوں گے، وزیراعلیٰ مزید نہیں بھاگ سکتے۔

یہ بھی پڑھیں: وزیر اعلیٰ اعتماد کے ووٹ میں شکست کھائیں گے، عطا تارڑ

انہوں نے مزید کہا کہ اربوں روپے کی کرپشن پرویز الہیٰ اور مونس الہیٰ نے لی، پرویز الہیٰ ووٹ لو یا گھر جاؤ، ای سی ایل میں پرویز الہیٰ کا نام ڈالنے کی تجویز زیر غور ہے۔

رانا مشہود کی گفتگو

دوسری جانب مسلم لیگ (ن) کے رہنما رانا مشہود احمد خان نے لاہور ہائیکورٹ میں میڈیا سے گفتگو کرتے ہوئے کہا کہ ووٹ نہ لینے پر قانون اور آئین میں کوئی گنجائش نہیں، اسوقت پنجاب کا کوئی سی ایم نہیں ہے، اگر انکے پاس ووٹ ہوتے تو لے لیتے، انکو بھی پتہ ہے کہ ووٹ نہیں ہے۔

عدالتی وزیر اعلیٰ آج نہیں رہے گا

انہوں نے کہا کہ 17 دن میں لوٹ مار کا بازار گرم کیا گیا، 21 21 بل ایک دن میں پیش کیے گئے، پنجاب کی عوام بھوک سے بلک رہی ہے اور مونس الہیٰ باہر پیسہ جمع کروانے گیا ہے۔

رانا مشہود نے مزید کہا کہ ہماری عدالت سے درخواست ہے کہ فیصلہ آج کے دن ہی ہو، عدالتی وزیر اعلیٰ آج نہیں رہے گا، ری الیکشن ہوگا، پنجاب میں سی ایم ن لیگ کا ہوگا۔