دہشت گردی کے خدشات کے پیش نظر کاؤنٹر ٹیررازم ڈپارٹمنٹ (سی ٹی ڈی) نے کومبنگ آپریشن تیز کردیے۔

تفصیلات کے مطابق سی ٹی ڈی کی جانب سے پنجاب کے مختلف اضلاع میں 49 مقامات پر کومبنگ اینڈ سرچ آپریشن کیے گئے۔

سی ٹی ڈی حکام نے بتایا کہ دہشتگرد نیٹ ورک کے خلاف کامیابی سے آپریشن کرتے ہوئے منڈی بہاوالدین، خوشاب، دنیاپور سے تین مشتبہ افراد گرفتار کرلیے گئے جبکہ لاہور کے علاقے یکی گیٹ سے ایک مشتبہ شخص کو گرفتار کیا گیا۔

سی ٹی ڈی حکام کا کہنا ہے کہ کارروائیوں کے دوران 517 افراد کی بائیو میٹرک تصدیق کی جبکہ 2713 افراد سے پوچھ گچھ کے دوران 3 مشتبہ افراد کی نشاندہی ہوئی۔

سی ٹی ڈی حکام نے بتایا کہ گرفتار افراد کے خلاف 4 مقدمات درج کردیے گئے ہیں اور تفتیش کے لیے نامعلوم مقام پر منتقل کردیا گیا ہے۔

سی ٹی ڈی حکام نے مزید کہا کہ ریاست دشمن عناصر کو قانون کے مطابق منطقی انجام تک پہنچانے کی ہر ممکن کوشش کی جائے گی۔

مزید پڑھیں: سی ٹی ڈی کا بڑا کریک ڈاؤن، 5 دہشتگرد گرفتار

واضح رہے کہ کاؤنٹر ٹیررازم ڈپارٹمنٹ (سی ٹی ڈی) کی جانب سے رواں ہفتے آئی جی پنجاب کی ہدایت پر سیکیورٹی اداروں کے ہمراہ 452 کومبنگ آپریشن کیے جس میں 208 مشتبہ افراد کو گرفتار کرکے 138 مقدمات درج کیے گئے۔

سی ٹی ڈی حکام نے بتایا کہ کومبنگ آپریشن کی کارروائیوں کے دوران 22 ہزار 8 سو افراد سے پوچھ گچھ کی گئی۔

یہ بھی پڑھیں: سی ٹی ڈی کا پنجاب میں بڑا آپریشن، 07 دہشتگرد گرفتار