لاہور: چیئرمین تحریک انصاف عمران خان نے ملک بھر میں حکومت کے خلاف پھر سڑکوں پر آنے کا فیصلہ کرلیا ہے۔

تفصیلات کے مطابق پاکستان تحریک انصاف (پی ٹی آئی) کی حکومت مخالف جاری تحریک کے معاملے پر پی ٹی آئی کے چیئرمین عمران خان حکومت کو مزید ٹف ٹائم دینے کے لیے سرگرم ہیں، چیئرمین عمران خان نے تمام صوبوں میں حکومت کے خلاف احتجاج کی ہدایت کر دی۔

پارٹی ذرائع نے بتایا کہ احتجاج میں مہنگائی اور معاشی صورتحال اور جلد انتخابات کا بیانیہ بنانے کی ہدایت دے دی گئی جبکہ آئندہ دو ہفتوں بعد چیئرمین تحریک انصاف نے خود بھی احتجاج میں شریک ہونے کا عندیہ دے دیا۔

ذرائع کے مطابق پی ٹی آئی رہنماؤں کو ہر یوسی سے ایک ایک ہزار ممبر فارم فل کروانے کی بھی ہدایت جاری کردی گئی ہے، ہر یوسی سے 1 ہزار کارکنوں پر مشتعمل متحرک ٹیم بنائی جائے گی۔

پارٹی ذرائع کا مزید کہنا تھا کہ احتجاج تحریک کے ساتھ ڈور ٹو ڈور کمپین بھی جاری رکھی جائے گی۔

پی ٹی آئی کا سندھ بھر میں مہنگائی کیخلاف احتجاج کا اعلان

دوسری جانب پاکستان تحریک انصاف کی جانب سے سندھ بھر میں مہنگائی کیخلاف احتجاج کا اعلان کردیا گیا ہے۔

 پی ٹی آئی کی جانب سے آج حیدرآباد میں مہنگائی مارچ کیا جائے گا جس کی قیادت سندھ اسمبلی میں قائد حزب اختلاف حلیم عادل شیخ کریں گے۔

یہ بھی پڑھیں:سال 2022 ؛ پاکستان میں مہنگائی کے نئے ریکارڈ قائم

اس حوالے سے حلیم عادل شیخ کا کہنا تھا کہ موجودہ مہنگائی میں غریب کا جینا مشکل ہوچکا ہے، عام اشیاء خرید سے کئی زیادہ دور ہوچکی ہیں تاہم اس سلسلے میں آج پہلی ریلی حیدرآباد میں ہالا ناکہ سے نکالی جارہی ہے، حیدرآباد کی عوام سے درخواست ہے وہ ریلی میں شرکت کریں۔

انہوں نے بتایا کہ سندھ تنظیم کی جانب سے سندھ بھر میں زبردست میمبرشپ مہم جاری ہے، مہنگائی کیخلاف بھی ریلیز اور مظاہروں کا سلسلہ شروع کردیا گیا ہے۔

یہ بھی پڑھیں: عمران خان کا جنوری کے پہلے ہفتے میں بنی گالہ منتقل ہونے کا امکان