امیر جماعت اسلامی کراچی حافظ نعیم الرحمان نے بلدیاتی الیکشن ہر صورت 15 جنوری کو کرانے کی ڈیڈ لائن دیدی۔

جماعت اسلامی کے امیر حافظ نعیم الرحمان نے کراچی میں میڈیا سے گفتگو کرتے ہوئے کہا کہ  بلدیاتی انتخابات ملتوی کرنے کی کوشش کی جارہی ہے، بلدیاتی الیکشن ہر صورت 15 جنوری کو ہونے چاہئیں۔

انہوں نے کہا کہ سندھ حکومت کو 24 گھنٹے کا وقت دے رہے ہیں، سندھ حکومت الیکشن کمیشن کو لکھا گیا خط واپس لے، اگر خط واپس نہ لیا تو سی ایم ہاؤس کے باہراحتجاج کرینگے۔

ایم کیو ایم نے اس وقت حلقہ بندیوں کا مسئلہ کیوں نہیں اٹھایا؟

حافظ نعیم الرحمان نے کہا کہ پی ٹی آئی نے کراچی سے ووٹ لیے لیکن پھر واپسی نہیں دیکھا، پی ٹی آئی کراچی کیلئے کوئی پروجیکٹ نہیں لائے۔

انہوں نے کہا کہ رجیم چینج پر ایم کیو ایم نے کراچی کا مینڈیٹ بیچا، ایم کیوایم نے اس وقت حلقہ بندیوں کا مسئلہ کیوں نہیں اٹھایا؟

امیر جماعت اسلامی کا کہنا ہے کہ کامران ٹیسوری کی تقرری میں پی ٹی آئی سمیت سب شامل ہیں، کامران ٹیسوری بھان متی کا کنبہ جوڑ رہے ہیں۔

حافظ نعیم الرحمان نے مزید کہا کہ کامران ٹیسوری پر کرمنل کیسز ہیں، جوڑ توڑ سے لگ رہا ہے کامران ٹیسوری کسی مشن پر آئے ہیں، انکے گورنر بننے کے بعد سازشیں زیادہ بڑھ گئیں۔

جماعت اسلامی الیکشن مہم چلارہی ہے

گزشتہ روز نعیم الرحمان نے ادارہ نورالحق میں پریس کانفرنس سے خطاب کرتے ہوئے کہا تھا کہ الیکشن 15 جنوری کو کروائے جائیں، صاف شفاف اور یقینی بنانے کے حوالے سے ضروری اقدامات کیے جائیں۔

امیر جماعت اسلامی نے کہا کہ زرداری ٹیسوری ڈاکٹرائن کے نتیجے میں الیکشن ملتوی کرنے کی سازشیں کی جارہی ہیں، ہم ہر صورت میں ان کی سازشوں کو بے نقاب کریں گے۔

نعیم الرحمان نے مزید کہا کہ جماعت اسلامی الیکشن مہم چلارہی ہے، ہمارا مقابلہ پارٹیوں سے نہیں مافیاز سے ہے، الیکشن مہم میں اختیارات کی منتقلی، آر اوز اور ڈی آر اوز کی غیر جانبدار تقرری کے حوالے سے بھی مہم چلائیں گے۔