نگران وزیراعلیٰ پنجاب محسن نقوی نے کہا ہے کہ امن و امان کو یقینی بنانا ہماری اولین ترجیح ہے۔

تفصیلات کے مطابق نگران وزیراعلیٰ پنجاب محسن نقوی کی زیرصدارت اعلیٰ سطح کا اجلاس ہوا جس میں انہوں نے انتظامی امور، مہنگائی پر قابو پانے اور جرائم کنٹرول کرنے کے حوالے سے ہدایات دیں۔

اس موقع پر چیف سیکرٹری نے محسن نقوی کو صوبے میں پرائس کنٹرول، انتظامی امور جبکہ آئی جی پولیس نے امن و امان کے حوالے سے بریفنگ دی۔

اجلاس کی صدارت کرتے ہوئے نگران وزیراعلیٰ پنجاب محسن نقوی نے کہا کہ مہنگائی کنٹرول کرنے کے لئے ضروری انتظامی اقدامات اٹھائے جائیں۔

انہوں نے کہا کہ شہریوں کو کسی بھی صورت ناجائز منافع خوروں اور ذخیرہ اندوزوں کے رحم وکرم پر نہیں چھوڑ سکتے۔

یہ بھی پڑھیں؛ نگراں وزیراعلیٰ پنجاب محسن نقوی نے آتے ہی متنازعہ تعیناتیاں شروع کردیں

ان کا کہنا تھا کہ انتظامی افسران مصنوعی مہنگائی پیدا کرنے والوں کے خلاف بلاامتیاز کارروائی کریں۔

ان کا یہ بھی کہنا تھا کہ اشیائے ضروریہ کی مقررکردہ نرخوں پر دستیابی یقینی بنائی جائے۔

اس موقع پر نگران وزیراعلیٰ محسن نقوی نے عوام کے جان و مال کے تحفظ کیلئے تمام ضروری اقدامات کا حکم بھی دیا۔

محسن نقوی نے کہا کہ سنگین جرائم میں ملوث ملزمان کے خلاف بلاامتیاز قانونی کاروائی کی جائے اور لا اینڈ آرڈر کی صورتحال کے حوالے سے نتائج سامنے آنے چاہئیں۔

یہ بھی پڑھیں؛ محسن نقوی کی تقرری، تحریک انصاف کا الیکشن کمیشن آفس کے باہر احتجاج

انہوں نے کہا کہ اسٹریٹ کرائمز کو کنٹرول کرنے کے لئے پولیس کو انتہائی فعال انداز میں فرائض سرانجام دینا ہوں گے۔

ان کا کہنا تھا کہ امن و امان کو یقینی بنانا اولین ترجیح ہے۔

نگران وزیراعلیٰ پنجاب محسن نقوی نے مزید کہا کہ خواتین اور بچوں کے خلاف جرائم میں ملوث ملزمان سے آہنی ہاتھوں سے نمٹا جائے۔

اجلاس میں چیف سیکرٹری زاہد اختر زمان، انسپکٹر جنرل پولیس عثمان انور اور سی سی پی او لاہور بلال کمیانہ نے بھی شرکت کی۔