مغربی ہواؤں کا سلسلہ ملک میں داخل ہورہا ہے جس کے بعد بیشتر علاقوں میں بارشوں کا نیا سلسلہ شروع ہونے کا امکان ہے۔

محکمہ موسمیات کے مطابق مغربی ہواؤں کا سلسلہ آج سے بلوچستان میں داخل ہوگا، جس کے بعد بلوچستان سمیت سندھ بھر میں بارش کا امکان ہے۔

محکمہ موسمیات نے ہفتے سے پیر کے دوران ملک کے مغربی اور بالائی علاقوں میں بارش اور پہاڑوں پر برفباری کی پیشگوئی کی ہے۔

محکمہ موسمیات کے مطابق مغربی ہوائیں ہفتے کو ملک کے مغربی علاقوں میں داخل ہونگی جو پیر تک بالائی علاقوں پر موجود رہیں گی۔

کراچی میں بوندا باندی کا امکان

محکمہ موسمیات نے بتایا کہ شہر قائد میں 28 تا 29 جنوری بوندا باندی کا امکان ہے تاہم جیکب آباد، قمبر شہداد کوٹ، شکار پور، لاڑکانہ، سکھر، گھوٹکی، خیرپور، شہید نظیر آباد، جامشورو سمیت دیگر اضلاع میں بھی ہلکی بارش کا امکان ہے۔

اس کے علاوہ کراچی، ٹھٹھہ، حیدرآباد، میر پور خاص میں بھی بوندا باندی کا امکان ہے۔

محکمہ موسمیات کے مطابق شہر میں 28 جنوری کی رات سے 29 جنوری کی صبح تک بونداباندی یا ہلکی بارش متوقع ہے اور اس دوران کم سے کم درجہ حرارت 8 تا 10 ڈگری سینٹی گریڈ رہنے کا امکان ہے۔

پی ڈی ایم اے الرٹ جاری

محکمہ موسمیات نے ملک کے بیشتر اضلاع میں بارش اور برفباری کے پیش نظر نیشنل ڈیزاسٹر مینجمنٹ اتھارٹی (این ڈی ایم اے) نے الرٹ جاری کردیا ہے۔

پی ڈی ایم اے کے مطابق 28 (رات) سے 30 جنوری کے دوران مری میں درمیانی سے شدید برفباری کا امکان ہے جس کے باعث سڑکیں بند اور لینڈ سلائیڈنگ کا خطرہ ہے تاہم شدید برفباری سے گاڑیوں کی آمدورفت میں خلل کا امکان ہے۔

پی ڈی ایم اے نے بتایا کہ 29 اور 30 جنوری کو اسلام آباد،لاہور، گوجرانوالہ، گجرات، حافظ آباد، منڈی بہاؤالدین، سیالکوٹ، نارووال، فیصل آباد، ٹوبہ ٹیک سنگھ اور جھنگ میں گرج چمک کے ساتھ بارش کا امکان ہے اور اسی دوران قصور، شیخوپورہ، ننکانہ صاحب، خوشاب، میانوالی اور سرگودھا میں بھی تیز ہواؤں اور گرج چمک کے ساتھ بارش متوقع ہے۔

مزید پڑھیں: سردیوں کی پہلی بارش کی پیشگوئی، متعلقہ اداروں کو پیشگی انتظامات کیلئے مراسلہ جاری

اس کے علاوہ بھکر، لیہ، ملتان، ڈیرہ غازی خان، بہاولپور، ساہیوال، اوکاڑہ اور پاکپتن میں ہلکی بارش متوقع اور چند مقامات پر ژالہ باری بھی متوقع ہے۔

پی ڈی ایم اے کا کہنا ہے کہ بارش کے بعد درجہ حرات میں 02 سے 04 ڈگری سینٹی گریڈ کمی کا امکان ہے۔

بارش کے دوران سیاحوں کو محتاط رہنے کی ہدایت

پی ڈی ایم اے کی طرف سے بارش کے دوران سیاحوں کو محتاط رہنے کی ہدایت جاری کردی گئی ہے۔

نیشنل ڈیزاسٹر مینجمنٹ اتھارٹی کا کہنا ہے کہ ڈرائیور حضرات بارش اور برفباری کی صورت میں محتاط ڈرائیونگ کو یقینی بنائیں۔

ترجمان پی ڈی ایم اے نے کہا ہے کہ ہنگامی صورتحال میں پی ڈی ایم اے کی ہیلپ لائن 1129 پر کال کرکے مدد لی جا سکتی ہے۔