گورنر پنجاب بلیغ الرحمان نے کہا ہے کہ وزیراعلیٰ پنجاب کی سمری کے بعد اسمبلی کی تحلیل آئینی ضرورت مگر مشکل مرحلہ ہے۔

اپنے ایک بیان میں بلیغ الرحمان نے کہا ہے کہ 2 روز میں اسمبلی تحلیل کا فیصلہ کرنا ہے اور سمری منظور کرتے ہی پنجاب اسمبلی تحلیل ہوجائے گی۔

انہوں نے کہا ہے کہ اسمبلی کو وقت سے پہلے تحلیل کرنا جمہوریت پسندوں کیلئے مشکل فیصلہ ہے تاہم 90 روز بعد رمضان ہیں، انتخابات کی تاریخ کو دیکھنا ہوگا۔

یہ بھی پڑھیں؛ پرویز الہٰی نے پنجاب اسمبلی توڑنےکی سمری پر دستخط کردیے

گورنر پنجاب نے کہا کہ اسمبلی تحلیل سے قبل انتخاب کی تاریخ بھی دینی ہوگی اور اس حوالے سے وزیراعلیٰ، اپوزیشن لیڈر کو ملکر معاملات 3 روز میں طے کرنے ہونگے۔

خیال رہے کہ پنجاب اسمبلی کی تحلیل کے لیے وزیراعلیٰ پنجاب کی سمری گورنر کو موصول ہوگئی ہے۔

 گورنر پنجاب بلیغ الرحمان نے ٹوئٹر پر اس بات کی تصدیق کی کہ انہیں پنجاب اسمبلی کی تحلیل کے لیے وزیراعلیٰ پنجاب کی سمری موصول ہوگئی ہے۔

گورنر پنجاب بلیغ الرحمان نے کہا کہ جو بھی فیصلہ کروں گا بھاری دل سےکروں گا، پنجاب اسمبلی عوامی نمائندگان کا ہاؤس ہے، اسمبلی کو تحلیل کرنا کوئی آسان فیصلہ نہیں ہوتا۔

انہوں نے کہا کہ وزیر اعلیٰ پنجاب کی ایڈوائس پر عمل درآمد کرنا ناخوشگوار لمحہ ہوگا۔

خیال رہے کہ  وزیراعلیٰ پنجاب چوہدری پرویز الہیٰ نے چیئرمین پی ٹی آئی عمران خان سے ملاقات کے دوران پنجاب اسمبلی تحلیل کرنے کی سمری پر دستخط کردیے اور پنجاب اسمبلی تحلیل کی ایڈوائس گورنر پنجاب کو بھجوا دی گئی تھی۔

بعد ازاں پی ٹی آئی کے مرکزی رہنما فواد چوہدری نے بتایا کہ وزیراعلیٰ نے پنجاب اسمبلی توڑنے کی سمری پر دستخط کردیے ہیں اور پنجاب اسمبلی تحلیل کی ایڈوائس گورنر پنجاب کو بھجوا دی گئی ہے۔

یہ بھی پڑھیں: گورنر پنجاب اسمبلی تحلیل کرنے کی ایڈوائس پر آئین اور قانون کے مطابق فیصلہ کریں گے، اعظم نذیر تارڑ