پنجاب اور خیبرپختونخوا اسمبلی انتخابات کیلئے انتخابی اتحاد قائم کرنا ہے یا سیٹ ایڈجسٹمنٹ کرنی ہے، اس حوالے سے قائد مسلم لیگ ن نواز شریف نے سینئر پارٹی رہنماؤں سے ابتدائی مشاورت شروع کردی۔

ذرائع کے مطابق نواز شریف نے لندن میں انتخابی شیڈول جاری ہونے کے بعد وطن واپسی کے حوالے سے بھی مشاورت کی۔

ذرائع نے بتایا کہ انتخابات سے متعلق تمام فیصلے مریم نواز کی وطن واپسی کے بعد کیے جائیں گے۔

ذرائع کے مطابق لیگی قیادت کو نواز شریف کی وطن واپسی کے حوالے سے تیار رہنے کی ہدایت کی گئی ہے۔

ذرائع کا کہنا ہے کہ انتخابی مہم کی نگرانی نواز شریف خود کریں گے جبکہ انتخابات کا شیڈول جاری ہونے پر حالات دیکھ کر واپسی سے متعلق حتمی فیصلہ کیا جائے گا۔

ذرائع نے بتایا کہ نواز شریف کی واپسی سے قبل مریم نواز پارٹی کو متحرک کریں گی، مریم نواز پنجاب بھر میں جلسوں اور ورکرز کنونشن سے خطاب کریں گی۔

اس موقع پر نواز شریف نے جلسوں اور ریلیوں کا شیڈول تیار کرنے کی ہدایت کر دی ہے۔

نواز شریف کی (ن) لیگ کو پنجاب میں انتخابات کی تیاری کی ہدایت 

چند ہفتے قبل وزیراعظم شہباز شریف کی زیرصدارت مسلم لیگ ن کی سینئر قیادت کا اجلاس ہوا تھا جس میں  مسلم لیگ ن نے پنجاب اور خیبر پختونخوا میں بھرپور الیکشن لڑنے، قومی اسمبلی اور دیگر دو صوبوں کے انتخابات اپنے مقررہ وقت پر کرنے کا فیصلہ کیا تھا۔

 نواز شریف نے پارٹی کو پنجاب میں بھرپور شرکت کی ہدایت دی اور اس بات پر بھی ہدایت دی کہ قیادت الیکشن کے لئے خود بھی تیار ہو اور ورکرز کو بھی متحرک کرے۔

قائد مسلم لیگ ن نواز شریف نے کہا کہ انتخابی مہم میں عمران خان کے دور میں ہونے والے معاشی، سفارتی و سیاسی نقصانات بارے آگاہ کیا جائے۔

خیال رہے کہ اس موقع پر نواز شریف نے مریم نواز کو رواں ماہ کے دوران ہی وطن واپس جانے کی ہدایت بھی کر دی تھی۔