پنجاب کی صورتحال کے معاملے پر وزیر اعظم شہباز شریف کے اتحادیوں سے رابطے جاری ہیں۔

ذرائع نے بتایا کہ وزیر اعظم نے سابق صدر آصف علی زرداری اور پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمان سے ٹیلی فونک رابطہ کیا اور دونوں راہنماؤں کے ساتھ پنجاب کی صورت حال پر گفتگو کی۔

ذرائع نے بتایا کہ تینوں راہنماؤں کے درمیان اتحادی جماعتوں کا اجلاس جلد بلانے پر بھی اتفاق ہوا۔

وزیراعظم سے آصف زرداری کا ٹیلیفونک رابطہ

دوسری جانب وزیراعظم شہباز شریف سےسابق صدر آصف زرداری کا ٹیلیفونک رابطہ ہوا۔

ذرائع کے مطابق دونوں رہنماؤں نے ایک دوسرے کی خیریت معلوم کی اور ایک دوسرے کے لیے نیک خواہشات کا اظہار کیا۔

ذرائع نے بتایا کہ ٹیلیفونک رابطے میں وزیراعظم اور آصف زرداری کے درمیان سیاسی صورتحال پر تبادلہ خیال ہوا اور ایم کیو ایم اور پیپلزپارٹی میں رنجیشیں ختم پر بھی بات ہوئی۔

یہ بھی پڑھیں: تحریکِ عدم اعتماد جمع تو کروا دی نمبرکیسے پورے کریں؟ پی ڈی ایم پریشان

اس موقع پر وزیراعظم شہباز شریف نے کہا کہ ن لیگ مصالحت کے لیے کردار ادا کرے گی۔

اس سے قبل وزیر اعظم محمد شہباز شریف سے ممبر پنجاب اسمبلی چوہدری اشرف علی انصاری کی ملاقات ہوئی جس میں صوبہ پنجاب کی سیاسی صورت حال پر تبادلہ خیال کیا گیا۔

پیپلز پارٹی اور ایم کیو ایم میں بلدیاتی الیکشن پر تنازعہ شدت اختیار کر گیا

متحدہ قومی موومنٹ (ایم کیو ایم) پاکستان اور پیپلز پارٹی کے درمیان  بلدیاتی الیکشن پر تنازعہ شدت اختیار کر گیا ہے۔

ذرائع کے مطابق پی ڈی ایم جماعتوں کی جانب سے ایک دوسرے کے بجھتے حکومتی چراغوں کو جلا دینے کی کوششیں جاری ہیں۔ پنجاب میں تنازعات حل کرنے کا تاثر دینے پیپلزپارٹی رہنما آصف زرادری و سندھ کے وزراء آتے ہیں، سندھ کے تنازعات حل کرنے کے لیے ن لیگ نے سندھ جانے کا فیصلہ کیا ہے۔

مزید پڑھیں: کیا پی پی پی، ایم کیو ایم سے کیے گئے وعدے پورے کرے گی؟

ذرائع نے بتایا کہ پیپلز پارٹی اور ایم کیو ایم میں بلدیاتی الیکشن پر تنازعہ شدت اختیار کر گیا ہے، وزیر اعظم شہباز شریف نے دونوں جماعتوں میں مصالحتی کردار ادا کرنے کا فیصلہ کیا ہے۔

ذرائع کا کہنا تھا کہ پیپلز پارٹی اور ایم کیو ایم میں مصالحت کے لئے مشن وفاقی وزیر سردار ایاز صادق کو سونپ دیا گیا ہے جبکہ شہبازشریف نے سردار ایاز صادق کو آج ہنگامی بنیادوں پر کراچی پہنچنے کی ہدایت کر دی ہے۔

ذرائع نے مزید بتایا کہ وفاقی وزیر سردار ایاز صادق آج کراچی جائیں گے اور کراچی میں دونوں اتحادی جماعتوں کے رہنماؤں سے ملاقات کرینگے۔