تحریک انصاف پاکستان (پی ٹی آئی) کے رہنما اسد عمر نے کہا ہے کہ تحریک انصاف بند کمروں کی سیاست پر یقین نہیں رکھتی۔

سابق وفاقی وزیر اسد عمر نے کراچی میں میڈیا سے گفتگو کرتے ہوئے کہا کہ نیا سال شروع ہوا ہے نئی امید ہے، امید ہے 2023 میں ملک میں چھائی ہوئی نحوست ختم ہوگی۔

ملک کے حالات انتہائی تشویشناک ہیں

انہوں نے کہا کہ ملک کے حالات انتہائی تشویشناک ہیں، ایک سال پہلے 20 کلو آٹا 1159 روپے تھا، کھانا پکانے کے تیل کی قیمت میں 33فیصد اضافہ ہوا، پیٹرول کی قیمت میں 53فیصد اضافہ ہوا اور ڈیزل کی قیمت میں65 فیصد اضافہ ہوا، حرام کا پیسہ لگا کر ضمیروں کی منڈی لگائی گئی۔

اسد عمر نے کہا کہ مہنگائی کو بنیاد بنا کر ہماری حکومت کو ہٹایا گیا، بین الاقوامی مارکیٹ میں خوردنی تیل کی قیمت کم ہوئی لیکن پاکستان میں خوردنی تیل کی قیمت بڑھ گئی ہے، امپورٹڈ حکومت کی سازش ناکام ہوگی۔

انکا کہنا ہے کہ اس وقت عوام مہنگائی کے طوفان سے متاثر ہیں، مہنگائی کیخلاف ملک گیر تحریک چلائی جائے گی، آج سے مہنگائی کیخلاف احتجاجی تحریک شروع کررہے ہیں۔

شہبازشریف بتائیں عوام کے ریلیف پر کتنے پیسے خرچ ہوئے

سابق وفاقی وزیر نے کہا کہ شہباز شریف نے اعلان کیا تھا کپڑے بیچ کر عوام کو ریلیف دوں گا، شہبازشریف بتائیں عوام کے ریلیف پر کتنے پیسے خرچ ہوئے، وزیراعظم نے کہا ساری رات جاگ کر عوام کی خدمت کروں گا، وزیراعظم کے ساری رات جاگنے پر عوام کا یہ حال ہو گیا ہے۔

پی ٹی آئی رہنما نے کہا کہ ٹیکسٹائل انڈسٹری کے 15لاکھ لوگ بےروزگار ہیں، آٹو موبائل بھی آہستہ آہستہ پروڈکشن بند کررہا ہے۔

اسد عمر نے مزید کہا کہ تحریک انصاف بند کمروں کی سیاست پر یقین نہیں رکھتی، مہنگائی کو کہتے ہیں مشکل فیصلے، اللہ انہیں ہدایت دے، یہ عمران خان کے عوام کو ریلیف کو بارودی سرنگیں کہتے ہیں۔