صدر مملکت ڈاکٹر عارف علوی کی جانب سے سویڈن میں قرآن پاک کی بےحرمتی کے گھناؤنے فعل کی مذمت کی گئی ہے۔

تفصیلات کے مطابق صدر مملکت ڈاکٹر عارف علوی نے سویڈن میں قرآن پاک کی بے حرمتی کی مذمت سمیت اسلامو فوبیا کے خلاف اجتماعی عزم کا مطالبہ بھی کیا ہے۔

انہوں نے کہا ہے کہ آزادی اظہار رائے کی آڑ میں اسلام کی مقدس کتاب کی توہین سے اربوں مسلمانوں کے جذبات کو ٹھیس پہنچائی گئی ہے اور یہ غیر اخلاقی واقعہ بلاوجہ اشتعال انگیزی اور دنیا کے مسلمانوں کے جذبات کو مجروح کرنے کا عمل ہے۔

یہ بھی پڑھیں: عمران خان کی سویڈن میں قرآن پاک کی بےحرمتی کے گھناونے فعل کی مذمت

انہوں نے مزید کہا کہ یہ قابل مذمت عمل بین الاقوامی سطح پر تسلیم شدہ اصولوں اور آزادی اظہار رائے کے جائز اظہار کے اصولوں کے منافی ہے کیونکہ آزادی اظہار رائے نفرت انگیز تقاریر اور لوگوں کو تشدد پر اکسانے کی اجازت نہیں دیتی ہے۔

ڈاکٹر عارف علوی کا کہنا تھا کہ اسلام دنیا کے تمام مذاہب کے لیے عزت اور احترام کی تلقین کرتا ہے  لیکن اس گھناؤنے فعل نے مسلمانوں کو ان کی مقدس اقدار کی توہین کرکے دکھ پہنچایا ہے اور یہ عمل دُنیا میں اسلاموفوبیا کی خطرناک سطح کو ظاہر کرتا ہے۔

انہوں نے مطالبہ کیا ہے کہ عالمی برادری اسلامو فوبیا کے خلاف مشترکہ عزم کا مظاہرہ کرے۔

صدر مملکت نے رواداری اور بقائے باہمی کی اقدار کو مستحکم کرنے کے لیے بین الاقوامی کوششوں کی ضرورت پر زور دینے ہوئے کہا ہے کہ نفرت کے نظریے کو فروغ دینے والے اور انتہا پسند اور بنیاد پرست عناصر کو نفرت پھیلانے کی اجازت نہ دینے کی ضرورت ہے۔

یہ بھی پڑھیں: سویڈن میں قرآن پاک کی بےحرمتی گھناؤنا فعل اور ناقابل قبول ہے، وزیراعظم

اس سے قبل وزیراعظم شہباز شریف نے بھی قرآن پاک کی بےحرمتی کے گھناؤنے فعل کی مذمت کرتے ہوئے ایک پیغام جاری کیا تھا۔

انہوں نے کہا کہ  آزادی اظہار کا لبادہ دنیا بھر کے ڈیڑھ ارب مسلمانوں کے مذہبی جذبات کو مجروح کرنے کے لیے استعمال نہیں کیا جا سکتا ہے۔

انہوں نے کہا کہ وزیراعظم پاکستان کا مزید کہنا تھا سویڈن میں دائیں بازو کے انتہا پسند کی جانب سے کیا گیا شرمناک فعل ناقابل قبول ہے۔

اس سے قبل پاکستان نے بھی سویڈن میں قرآن پاک کی بے حرمتی کے گھناؤنے فعل کی شدید مذمت کی تھی۔

گزشتہ روز ترجمان دفتر خارجہ نے اپنے بیان میں کہا تھا کہ قرآن پاک کی بےحرمتی سے ڈیڑھ ارب  مسلمانوں کے مذہبی جذبات کو ٹھیس  پہنچی، مسلمانوں کے مذہبی جذبات کو ٹھیس پہنچانا اظہار رائے کی  آزادی میں نہیں آتا ہے۔