صوبائی وزیر سعید غنی نے کہا ہے کہ جماعت اسلامی کے ساتھ بیٹھ کر بلدیاتی سیٹ اپ بنانے کیلئے تیار ہیں لیکن جماعت اسلامی صرف ٹی وی پر بیٹھ کر میئر کی سیٹ مانگ رہی ہے۔

تفصیلات کے مطابق پریس کانفرنس کرتے ہوئے رہنما پیپلزپارٹی سعید غنی نے کہا ہے کہ جماعت اسلامی کو ٹی وی پر میئر کی سیٹ نہیں ملے گی، وہ  آئیں بیٹھ کربات کریں تو ہوسکتا ہے کہ ایک دوسرے کو قائل کرلیں۔

یہ بھی پڑھیں: جماعت اسلامی سے بات کرنے اور راستہ نکالنہ کے لیے تیار ہیں، سعید غنی

انہوں نے کہا کہ ہمیں اثر انداز ہونا ہوتا تو دوبارہ گنتی کی درخواست مسترد کرادیتے لیکن قانون میں دوبارہ گنتی کا اختیار ریٹرننگ افسران کے پاس ہے۔

انہوں نے مزید کہا کہ ہماری جیت پر سوالات اٹھائے جارہے ہیں جبکہ کئی جگہوں پر ہمارے امیدوار بہت کم مارجن سے ہارے ہیں اور ایک جماعت صفر سے100  پر چلی گئی تو خوش ہیں۔

سعید غنی کا کہنا تھا کہ کل جماعت اسلامی نےکوشش کی ایک حلقے میں ری کاؤنٹنگ نہ ہو لیکن ری کاؤنٹنگ کے معاملے پر دہرا معیار نہیں ہونا چاہیے کیونکہ ہمیں بھی کئی جگہوں پر نتائج پر اعتراض ہے اور پی ٹی آئی،جماعت اسلامی کی درخواستوں پر ری کاؤنٹنگ ہورہی ہے۔

ان کا کہنا تھا کہ ری کاؤنٹنگ پر جماعت کو اندازہ ہوا کہ اختر کالونی کی سیٹ جارہی ہے تو ہنگامہ آرائی کی لیکن اختر کالونی کی یوسی میں دوبارہ گنتی میں پیپلزپارٹی جیتی۔

انہوں نے کہا کہ جماعت اسلامی سے ترجیحی طور پر بات کرنا چاہتے ہیں، کوشش ہے کہ میئر کا معاملہ ملکر طے کریں اور جن نشستوں پر اعتراض ہے انہیں قانون کے مطابق آگے بڑھا سکتے ہیں۔

انہوں نے مزید کہا کہ کل ایک کلپ میرے پاس آیا جس میں حافظ نعیم نے کہا کہ ری کاؤنٹنگ کر کے اپنے بھائی کو جتوایا جبکہ میرا بھائی فرحان غنی2 نشستوں سے الیکشن لڑا تھا جس میں وہ ایک یوسی س ےجیتا اور ایک سے ہارا ہے۔