وزیراعظم کے مشیر برائے آمور کشمیر و گلگت بلتستان قمر زمان کائرہ نے کہا ہے کہ آج بھارت دنیا کے سامنے ایک ہندو فاشسٹ ملک کے طور پر بے نقاب ہو چکا ہے۔

تفصیلات کے مطابق بھارت کے یوم جمہوریہ  کے موقع پر قمر زمان کائرہ نے اپنے خیالات کا اظہار کرتے ہوئے کہا ہے کہ بھارت کے نام نہاد یوم جمہوریہ کو مظلوم کشمیری عوام یوم سیاہ کے طور پر منا رہے ہیں۔

انہوں نے کہا کہ مقبوضہ کشمیر پر ناجائز قبضے کے باوجود خود کو ایک جمہوریہ کہلانا بھارت کے لیے شرمناک ہے جبکہ ایک جانب بھارت یوم جمہوریہ منا رہا ہے تو دوسری جانب اس نے کشمیریوں کے بنیادی حقوق تک سلب کر رکھے ہیں۔

انہوں نے مزید کہا کہ بھارت مقبوضہ کشمیر میں انسانیت سوز مظالم ڈھا رہا ہے اور بھارت میں ہندو انتہا پسندی اور اقلیتوں پر مظالم اپنی آخری حدود تک پہنچ چکے ہیں۔

خیال رہے کہ مقبوضہ کشمیر میں بھارت کے یوم جمہوریہ کو یوم سیاہ کے طور پر منایا جارہا ہے۔

بھارت کے یوم جمہوریہ پر دنیا بھر میں کشمیری یوم سیاہ منا رہے ہیں جبکہمقبوضہ وادی میں کشمیریوں نے اپنے گھروں پر سیاہ جھنڈے لہرا دئیے ہیں۔

میر واعظ عمر فاروق اور دیگر حریت رہنماؤں کی اپیل پر مقبوضہ کشمیر میں مکمل ہڑتال ہے جبکہ دکانیں، کاروباری مراکز اور تعلیمی ادارے بند ہیں اور سڑکوں پر ٹرانسپورٹ موجود نہیں ہیں۔

بھارت نے یوم سیاہ پراحتجاجی ریلیوں کو روکنے کے لیے مقبوضہ وادی میں اضافی فوجی دستے تعینات کردئیے ہیں جبکہمختلف گلیوں اور سڑکوں کو خاردار تاریں لگا کر بند کردیا گیا ہے جبکہ متعدد علاقوں میں موبائل اور انٹرنیٹ سروس بھی معطل ہے۔