پاکستان تحریک انصاف (پی ٹی آئی) کے رہنما فواد چوہدری نے کہا ہے کہ اسمبلی تحلیل کرنے پر فیصلہ ہو چکا ہے۔

سابق وفاق وزیر فواد چوہدری نے لاہور میں میڈیا سے گفتگو کرتے ہوئے کہا کہ ہمارے لیے کوئی سرپرائز نہیں تھا، ہمیں پتہ تھا کہ ہمارے بندے پورے ہیں، جو چنوں منوں آئے ہوئے تھے ان کو سرپرائز ملا ہے۔

انہوں نے کہا کہ اسمبلی تحلیل کرنے پر فیصلہ ہو چکا ہے، ہم تو چاہتے ہیں کہ پنجاب اور کے پی اسمبلیاں آج ہی تحلیل ہو جائیں۔

ہم یہ لڑائی عوام کی حمایت سے لڑ رہے ہیں

فواد چوہدری نے کہا کہ یہ جوتے چھوڑ کر بھاگنا چاہ رہے ہیں، یہ عوام کے پاس جانے کے لیے تیار نہیں ہیں، ہم اس لیے ہر جگہ جیت رہے ہیں کہ عوام ہمارے ساتھ ہے، ہم یہ لڑائی عوام کی حمایت سے لڑ رہے ہیں۔

سابق وفاق وزیر کا کہنا ہے کہ ہم نے رانا ثناء اللہ اور عطاء اللہ تارڑ کو سکون آور ادویات دے کر بھیجا ہے، ان دو چمچوں اور آصف زرداری کو نیند نہیں آ رہی ہے۔

فواد چوہدری نے مزید کہا کہ منحرف اراکین کے خلاف کارروائی کریں گے، لیکن اب اسمبلی تحلیل ہو جانی ہے اس کا فائدہ نہیں ہے، یہ بے شرم لوگ ہیں، ان کو عوام سے جوتے پڑیں گے، حساب برابر ہو جائے گا۔

فواد چوہدری کا ٹوئٹ

اس سے قبل رہنما تحریکِ انصاف و سابق وفاقی وزیر فواد چوہدری نے اپنے ٹوئٹر پر کہا تھا کہ آئین کا آرٹیکل 14 شہریوں کے وقار اور پرائیویسی کے تحفظ کا حق دیتا ہے۔

آئین کا آرٹیکل 14 شہریوں کے وقار اور پرائیویسی کے تحفظ کا حق دیتا ہے،ملک کا وزیر داخلہ اور معاون خصوصی فخر سے بتاتے ہیں کہ وہ ممبران اسمبلی کی جیو فنسنگ کرتے ہیں حتئ کہ FIA ارکان کا ٹریول ریکارڈ بھی ان سے شئیر کرتی ہے،آئین کی خلاف ورزی کے اس اعتراف کے بعد کاروائ ہونی چاہئے pic.twitter.com/g5wvIe0gtW

— Ch Fawad Hussain (@fawadchaudhry) January 12, 2023

چوہدری فواد حسین نے کہا کہ ملک کا وزیر داخلہ اور معاون خصوصی فخر سے بتاتے ہیں کہ وہ ممبران اسمبلی کی جیو فنسنگ کرتے ہیں۔ حتیٰ کہ ایف ائی اے ارکان کا ٹریول ریکارڈ بھی ان سے شئیر کرتی ہے۔

رہنما تحریکِ انصاف نے مزید کہا کہ آئین کی خلاف ورزی کے اس اعتراف کے بعد کاروائی ہونی چاہئے۔

یہ بھی پڑھیں: تحریک انصاف اور ق لیگ پنجاب اسمبلی تحلیل کرنے کے لیے تیار