عوامی مسلم لیگ کے سربراہ  شیخ رشید احمد نے کہا ہے کہ ملک ٹیکنیکلی طور پر ڈیفالٹ ہوگیا ہے صرف اعلان کرنا باقی ہے۔

سماجی رابطے کی ویب سائٹ ٹوئٹر پر اپنے جاری کردہ بیان میں شیخ رشید نے کہا کہ اوورسیز پاکستانی اس امید سے بیٹھے ہیں کہ کب ان کو ووٹ کاحق ملے گا۔

ملک ٹیکنیکلی طورپرڈیفالٹ ہوگیاہےصرف اعلان کرناباقی ہےاوورسیزپاکستانی اس امیدسےبیٹھےہیں کہ کب ان کوووٹ کاحق ملےگاLCکھل نہیں رہی مہنگائی عروج پرہےعنقریب اس حکومت کےخلاف ایسا زناٹےداراحتجاج ہوگاکہ سناٹاپڑجائےگالندن میں نوازشریف کےگھر کےباہرروزلوگ احتجاج کررہےہیں مگراس کوشرم نہیں آری

— Sheikh Rashid Ahmed (@ShkhRasheed) January 20, 2023

انہوں نے کہا کہ ایل سی کھل نہیں رہی مہنگائی عروج پر ہے، عنقریب اس حکومت کے خلاف ایسا زناٹے دار احتجاج ہوگا کہ سناٹا پڑجائے گا۔

حکومت نے ملک کو تباہی کے دہانے پر لاکر کھڑا کردیا

سابق وزیراعظم نے کہا کہ لندن میں نواز شریف کے گھر کے باہر روز لوگ احتجاج کررہے ہیں مگر اس کو شرم نہیں آرہی۔

شیخ رشید نے کہا کہ حکومت نے ملک کو تباہی کے دہانے پر لا کر کھڑا کردیا ہے، نہ آئی ایم ایف سے قسط مل رہی اور نہ ہی باہر سے  امداد صرف کابینہ میں معاون خصوصی بڑھائے جارہے ہیں۔

انہوں نے مزید کہا کہ غریب پیسے دے کر آٹے کی لائن میں مر رہا ہے، حالات اتنے سنگین ہوگئے ہیں کہ اللہ کے بعد سپریم کورٹ ہی ملک کو بچا سکتی ہے، جلد الیکشن ملک میں استحکام لاسکتے ہیں۔

اس سے قبل شیخ رشید نے  لندن میں بول نیوز سے خصوصی گفتگو کرتے ہوئے کہا تھا کہ پنجاب اور خیبر پختونخواہ کے انتخابات پی ٹی آئی بھاری اکثریت سے جیت کر پانچ سال کے لیئے حکومت بنائے گی اور دو اسمبلیوں میں پی ٹی آئی کی حکومت بننے کے بعد وفاق میں کسی کی بھی حکومت ہو فرق نہیں پڑتا ہے۔

شیخ رشید نے کہا کہ دو اسمبلیاں تحلیل ہوچکی ہیں اب حکومت کے پاس الیکشن کے علاوہ کوئی راستہ نہیں ہے، پی ڈی ایم الیکشن سے بھاگ رہی ہے لیکن جب بھی الیکشن ہوں گے عمران خان واضح اکثریت سے الیکشن جیت جائیں گے۔

شیخ رشید نے کہا کہ میں عمران خان کے ساتھ کھڑا ہوں کیونکہ عمران خان ایماندار اور بہادر لیڈر ہے وہ ملک کو بحرانوں سے نکال لے گا۔

یہ بھی پڑھیں: عمران خان نے ساری پارٹیوں کو چاروں شانے چت کردیا ہے، شیخ رشید

اس موقع پر شیخ رشید کا کہنا تھا کہ دو بڑی خوش خبریاں دے رہا ہوں کہ سمندر پار پاکستانیوں کو ووٹ کا حق ملنے جا رہا ہے جس کے بعد سمندر پار پاکستانیوں کے ووٹ کا اسمبلی میں اہم کردار ہو گا اور شہباز شریف کو عدم اعتماد کے ووٹ کا سامنا کر نا ہے۔

انہوں نے مزید کہا کہ حکومت آئی ایم ایف سے مذاکرات میں ناکامی کی وجہ سے قرضہ کی قسط لینے میں ناکام ہو گئی ہے جس کی وجہ سے معاشی حالات مزید سنگین ہو گئے ہیں لیکن مارچ اپریل میں عوام اس سے ان کا حساب لے گی۔