پاکستان تحریک انصاف کے رہنما و عمران خان کےچیف آف اسٹاف آفیسر شبلی فراز کا کہنا ہے کہ  رانا ثنا اللہ  ایک مجرم ہے اس کی کوئی حیثیت نہیں۔

بول نیوز  کے نمائندے سے خصوصی گفتگوکرتے ہوئے عمران خان کے چیف آف اسٹاف آفیسر شبلی فراز کا کہنا  تھا کہ ملک کی بدقسمتی ہے کہ رانا ثنااللہ جیسا جرائم پیشہ شخص وزیر داخلہ ہے۔

شبلی فراز نے کہا کہ رانا ثنا اللہ ایک مجرم ہے اور اس کی کوئی حیثیت نہیں ہے۔ وہ اپنے آقاؤں کو خوش کرنے کے لیے ہر قسم کی زبان استعمال کرتا ہے۔

انہوں نے کہا کہ رانا ثنا کا ماڈل ٹاؤن اور فیصل آباد واقعات میں جو کردار رہا وہ عوام کے سامنے ہے۔ مسلم لیگ ن کے لوگ بھی رانا ثنااللہ کے قصے سناتے ہیں۔

مزید پڑھیں: کراچی بلدیاتی انتخابات، پی ٹی آئی کا بھرپور سیاسی قوت سے میدان میں اترنے کا فیصلہ

پی ٹی آئی رہنما کا کہنا تھا کہ رانا ثنا کو وزیر داخلہ لگانا ایسا ہے جیسے کسی ڈاکو کو بینک کا چوکیدار لگادینا۔ یہ اپنے کیسز معاف کروانے کے لیے اقتدار سے چمٹے ہوئے ہیں۔

شبلی فراز نے مزید کہا کہ ملک کے معاشی ،داخلی اور بیرونی حالات خراب ہیں۔ سیاسی استحکام کے لیے جلد انتخابات کا ہونا ضروری ہے۔

ان کا کہنا تھا کہ پنجاب میں اعتماد کے ووٹ لینے پر لیت و لعل سے کام نہ لیا جائے۔امکان ہے قومی اسمبلی کی طرح پنجاب اسمبلی سے بھی پی ٹی آئی باہر نکل آئے۔

پی ٹی آئی رہنما نے کہا کہ اس ملک میں آؤ اور لوٹو کے کلچر کو فروغ دیا گیا ہے۔ وفاقی کابینہ عیاشیوں کے لیے بیرون ملک کے دورے کر رہی  ہے ۔بلاول اور شہباز شریف قوم کے اربوں روپے غیر ملکی دوروں پر لگا رہے ہیں۔

مزید پڑھیں: پی ٹی آئی اراکین کے استعفوں کا معاملہ؛ اسپیکر قومی اسمبلی کا موقف غلط ثابت

شبلی فراز نے کہا کہ اب تحریک انصاف کی ایک تجربہ کار حکومت اقتدار میں آئے گی۔ ہم نے ملکی معیشت کو بہتر بنانے کے لیے تیاری شروع کر رکھی ہے۔

انہوں نے مزید کہا کہ  بلاول کو بطور وزیر اعظم لانچ کرنا ایک بہت بڑا مذاق ہے۔بلاول بھٹو کی نالائقی وزارت خارجہ میں کچھ نہ کر کے بھی عیاں ہے۔پتہ ہے بلاول بھٹو زیادہ وقت امریکہ میں کیوں گزار رہے ہیں۔

پی ٹی آئی رہنما نے کہا کہ  ملک کی بدقسمتی  ہے کہ عمران خان اورمریم نواز کا موازنہ کیا جاتا ہے۔ عمران خان پاکستان میں اور مریم نواز بیرون ملک علاج کراتی ہیں۔  یہ سب عوام کے پیسے لوٹ کر عیاشیاں کر رہے ہیں۔