کراچی میں بلدیاتی انتخابات کیلئے پالیس کی جانب سے سیکیورٹی پلان مرتب کرلیا گیا ہے جس کے تحت 52 ہزار سے زائد پولیس اہلکار فرائض انجام دیں گے۔

تفصیلات کے مطابق کراچی میں بلدیاتی انتخابات کے لیے پولیس کا سیکیورٹی پلان تیار  کرلیا گیا ہے۔

اس حوالے سے پولیس حکام کا کہنا ہے کہ شہر بھر میں 52 ہزار 591 اہلکار سیکیورٹی کے فرائض انجام دیں گے جس میں 43 ہزار 6 سو 05 اہلکار کراچی کی نفری ہے اور اسکے علاوہ دیگر اضلاع سے کراچی لائے گئے ہیں۔

یہ بھی پڑھیں: کراچی حیدر آباد میں بلدیاتی انتخابات 15 جنوری کو ہی ہونگے، الیکشن کمیشن کا فیصلہ

پولیس حکام نے بتایا کہ اندرون سندھ سے ساوتھ زون میں 27 سو اہلکار لائے گئے ہیں جبکہ سندھ سے ایسٹ زون میں 6 ہزار 8 سو 33  اہلکار لائے گئے ہیں اور ویسٹ زون میں 7 ہزار 6 سو 98 اضافی نفری منگوائی گئی ہے۔

حکام کے مطابق سندھ بھر کے ٹریننگ سینٹرز ، سی ٹی ڈی یونٹ ، ایس ایس یو یونٹ اور ضلعی نفری بلوائی گئی ہے۔

پولیس حکام نے بتایا ہے کہ انتہائی حساس پولنگ اسٹیشن میں 6 سے 8 اہلکار تعینات ہونگے تاہم ہنگامی صورحال سے نمٹنے کے لئے ریزرو فورس کو فوری استعمال کیا جائے گا۔

دوسری جانب وزارت داخلہ نے 500 پولنگ اسٹیشنز پر رینجرز کی اسٹیٹک ڈیوٹی کی یقین دہانی کرادی  ہے جس کے بعد الیکشن کمیشن کی جانب سے 500 انتہائی حساس پولنگ اسٹیشنز کی فہرست تیار کرلی گئی ہے۔

الیکشن کمیشن کی جانب سے 500 انتہائی حساس پولنگ اسٹیشنز کی فہرست وزارت داخلہ کو بھجوا دی گئی جس میں 5 ہزار رینجرز اہلکاروں کی اسٹیٹک ڈیوٹی کی درخواست کی گئی ہے۔

یہ بھی پڑھیں: بلدیاتی الیکشن، وزارت داخلہ کی فوج اور رینجرز کی تعیناتی سے معذرت

خیال رہے کہ وزارت داخلہ کی منظوری کے بعد رینجرز اہلکاروں کی تعیناتی کی جائے گی تاہم الیکشن کمیشن کی جانب سے آج شام سے رینجرز اہلکاروں کو تعینات کرنے کی درخواست کی گئی ہے۔