لاہور: وزیراعلیٰ پنجاب پرویزالہیٰ کے اعتماد کے ووٹ کے معاملے پر پاکستان مسلم لیگ ن کے قائد نواز شریف اور چیف آرگنائزر مریم نواز شریف نے پارٹی کی صوبائی قیادت پر شدید برہمی کا اظہار کیا ہے۔

پارٹی ذرائع کے مطابق سابق وزیراعظم نواز شریف نے وزیراعلیٰ پنجاب کے اعتماد کے ووٹ کے معاملے پر فوری رپورٹ طلب کر لی۔

ذرائع نے بتایا نواز شریف نے کہا کہ پارٹی قیادت کو آگاہ کیا گیا تھا کہ تحریک انصاف کے کم از کم 7 ناراض اراکین پی ڈی ایم سے رابطوں میں ہے۔

پارٹی ذرائع کے مطابق نواز شریف نے استفسار کیا کہ ناراض اراکین کیسے ووٹنگ کے لئے پہنچ گئے، انہیں مینج کیوں نہیں کیا جاسکا۔

ذرائع نے بتایا کہ رانا ثناء اللہ نے نواز شریف اور مریم نواز کو معاملے پر ابتدائی رپورٹ پیش کی اور مریم نواز کی فوری وطن واپسی کی تجویز دی۔

یہ بھی پڑھیں؛ اپوزیشن کو شکست کا خوف، پنجاب اسمبلی میں ہنگامی آرائی

پارٹی ذرائع نے مزید کہا کہ مریم نواز فوری وطن واپس نہیں آتیں تو پارٹی کو نقصان ہو سکتا ہے۔

واضح رہے کہ چوہدری پرویز الہیٰ اعتماد کا ووٹ لینے میں کامیاب ہوگئے ہیں، 186 ارکان اسمبلی نے وزیراعلیٰ پنجاب پر اعتماد کا اظہار کیا۔

پی ٹی آئی کے رکن صوبائی اسمبلی اور سینئر صوبائی وزیر میاں اسلم اقبال اور راجہ بشارت نے وزیراعلیٰ پنجاب پر اعتماد کے ووٹ پر رائے شماری کے لیے قرارداد پیش کی جب کہ ووٹنگ پر سیکرٹری پنجاب اسمبلی اراکین کو بریفنگ دی۔

بعد ازاں چوہدری پرویز الہیٰ اعتماد کا ووٹ حاصل کرنے میں کامیاب ہوئے۔ وزیراعلیٰ پرویزالٰہی پر186 ارکان اسمبلی نے اعتماد کا اظہار کیا ۔ اسپیکر پنجاب اسمبلی نے اعلان کیا کہ پرویز الہیٰ نے 186 ووٹ حاصل کیے ہیں۔

اپوزیشن کا بائیکاٹ

 پنجاب اسمبلی کے اجلاس کے دوران اپوزیشن کی جانب سے شور شرابہ کیا گیا اور بعد ازاں اپوزیشن کی جانب سے اسمبلی اجلاس کا بائیکاٹ کردیا گیا۔

یہ بھی پڑھیں: وزیراعلیٰ پنجاب پرویز الہیٰ اعتماد کا ووٹ لینے میں کامیاب

اپوزیشن اراکین نے ایجنڈے کی کاپیاں پھاڑ دیں اور اپویزن نے ایوان میں کرسیاں بھی اچھالی جب کہ بائیکاٹ بائیکاٹ کے نعرے لگاتے ہوئے ایوان سے واک آؤٹ کر دیا۔

شکست سامنے دیکھ کر ن لیگ اور پیپلز پارٹی کے ارکان پنجاب اسمبلی سے چلے گئے۔ شرمندگی سے بچنے کے لیے اپوزیشن اراکین رائے شماری کے دوران ہی احتجاج کرتے ہوئے ایوان سے باہر نکل گئے جب کہ وفاقی وزیر داخلہ رانا ثنأللہ اور عطا تارڑ بھی ایوان سے چلے گئے۔