چیئرمین سینیٹ صادق سنجرانی کی جانب سے وفاقی وزیر خزانہ اسحاق ڈار سے بلوچستان کے واجب الاادا رقم جاری کرنے کی درخواست کی گئی ہے۔

تفصیلات کے مطابق بلوچستان کے مالی بحران کے پیش نظر چئیرمین سینیٹ صادق سنجرانی نے وزیر خزانہ اسحاق ڈار سے رابطہ کیا جس میں صادق سنجرانی نے  وفاقی وزیر خزانہ اسحاق ڈار سے بلوچستان کے واجب الاادا رقم جاری کرنے کی درخواست کی۔

دوسری جانب وفاقی وزیر خزانہ اسحاق ڈار نے بلوچستان کے واجبات کی ادائیگی آج ہی جاری کرنے کی یقین دہانی کرائی۔

چیرمین صادق سنجرانی نے اپنی اور نے وزیراعلیٰ بلوچستان عبدالقدوس بزنجو کی جانب سے وزیر خزانہ اسحاق ڈار کی یقین دہانی پر شکریہ ادا کیا۔

چیرمین سینیٹ نے مزید کہا کہ وفاق کی جانب سے رقم کی ادائیگی سے مالی بحران کو قابو پانے میں مدد ملے گی۔

بلوچستان مالی مشکلات کا شکار، وفاق کے غیر سنجیدہ انداز پر وزیراعلیٰ کا اظہار تشویش

بلوچستان شدید مالی مشکلات کا شکار ہے جس پر وفاق کے غیر سنجیدہ انداز پر وزیراعلیٰ بلوچستان  عبدالقدوس بزنجو نے گزشتہ روز تشویش کا اظہار کیا۔

وزیراعلیٰ عبدالقدوس بزنجو نے بتایا کہ صوبے کے مالی بحران پر بارہا وفاق کو آگاہ کرچکے ہیں لیکن وفاق کی سنی ان سنی کی پالیسی باعث تعجب ہے۔

یہ بھی پڑھیں: بلوچستان کی صوبائی حکومت شدید مالی بحران کی زد میں آگئی

انہوں نے کہا کہ حکومت بلوچستان اپنے ملازمین کی تنخواہیں بھی اد کرنے کے قابل نہیں رہی ہے اور تمام ترقیاتی کام ٹھپ ہوکر رہ گئے ہیں جبکہ شدید سردی میں سیلاب متاثرین بحالی کے منتظر ہیں۔

انہوں نے مزید کہا کہ ہمیں ہمارا شیئر مل جائے اپنے متاثرین کو خود سنبھال سکتے ہیں لیکن وزیراعظم تو ہماری بات سمجھ رہے ہیں، متعلقہ محکمے معاملے کو سنجیدہ نہیں لے رہے جبکہ وہ خود سیلاب زدہ علاقوں کے دورے کرچکے ہیں انہیں حالات کا بخوبی اندازہ ہے۔

وزیراعلیٰ نے وزیراعظم سے اپیل کی کہ متعلقہ محکموں کی ٹیموں کے ہمراہ کوئٹہ آکر خود بلوچستان کے مالی بحران کا جائزہ لیں اور پی پی ایل سے بھی صوبے کے واجبات کی ادائیگی میں کردار ادا کریں۔