سبی، ریلوے ٹریک پر ریموٹ کنٹرول بم دھماکا کے باعث ٹرین پٹری سے اتر گئی ہے جبکہ حادثے کے نتیجے میں اب تک متعدد افراد زخمی ہونے کی اطلاعات ہیں۔

تفصیلات کے مطابق بلوچستان کے علاقے سبی  کے قریب ریلوے ٹریک پر دھماکہ ہوا ہے جس کے باعث مچھ سے پشاور سے جانے والی ٹرین جعفر ایکسپریس کی 8 بوگیاں پٹری سے اتر گئیں ہیں۔

دھماکہ پیشی اور پنیر ریلوے اسٹیشن کے درمیان ہوا ہے جس کی وجہ سے جعفر ایکسپریس کا انجن تباہ ہوکر کھائی میں گرگیا ہے اور07   بوگیاں بھی بری طرح متاثر ہوئیں ہیں۔

دھماکے کے باعث ابتدائی طور متعدد مسافروں کے زخمی ہونے کی اطلاعات ہیں تاہم انتظامیہ کی جانب سے ایمرجنسی نافذ کردی گئی ہے۔

ریسکیو حکام کا کہنا ہے کہ متاثرہ بوگی میں دبے 5 زخمیوں کو نکال لیا گیا ہے جبکہ مزید مسافر بھی دونوں بوگیوں میں پھنسے ہوئے ہیں

اس حوالے سے ریلوے حکام کا کہنا ہے کہ سبی سے ریلیف ٹرین اور ریسکیو عملہ جائے وقوعہ کے روانہ کردیا گیا ہے۔

دوسری جانب ڈی سی بولان آغا سمیع اللہ کا کہنا ہے کہ ابتدائی اطلاعات کے مطابق 15 افراد زخمی ہیں جبکہ علاقہ پہاڑی دشوار گزار ہونے کی وجہ سے ریسکیو ٹیموں کو مشکلات کا سامنا ہے۔

ڈپٹی کمشنر بولان نے ضلع کے تمام اسپتالوں میں ایمرجنسی نافذ کر دی گئی ہے تاہم زخمیوں کو مچھ اور کوئٹہ کے اسپتال منتقل کیا جارہا ہے ۔

دھماکے کے متعلق ذرائع کا کہنا ہے کہ ابتدائی اطلاعات کے مطابق دھماکہ ریموٹ کنٹرول ڈیوائس سے ہوا ہے تاہم جائے وقوع پر امدادی کارروائیاں جاری ہیں۔

دھماکے سے ریلوے ٹریک کا 5 سے 6 فٹ حصہ متاثر ہوا جبکہ دھماکے کے مقام پر 4 فٹ گہرا گڑھا پڑگیا ہے۔