صدرمملکت ڈاکٹر عارف علوی نے کہا ہے کہ نیا چینی سال پاک چین تعلقات کے لیے یادگار ثابت ہوگا۔

تفصیلات کے مطابق صدر مملکت ڈاکٹر عارف علوی سے چین کے سبکدوش ہونے والے سفیر مسٹر نونگ رونگ کی الوداعی ملاقات ہوئی جس میں صدر مملکت نے وی پیک کے تحت چین کی جانب سے پاکستان میں تقریباً 62 ارب امریکی ڈالر کی متوقع سرمایہ کاری کو سراہا۔

ملاقات میں گفتگو کرتے ہوئے صدر مملکت ڈاکٹر عارف علوی نے کہا کہ تجارت، سرمایہ کاری اور کاروبار کے بے پناہ امکانات کو مدنظر رکھتے ہوئے دو طرفہ تجارت کو مستقبل میں خاطر خواہ اضافہ کیا جا سکتا ہے۔

صدار مملکت نے امید بھی ظاہر کی کہ تجارت کا توازن باہمی طور پر فائدہ مند ہوگا۔

عارف علوی نے کہا کہ سی پیک کے تحت انیس منصوبے مکمل کیے گئے جبکہ اٹھائیس زیر تعمیر ہیں اور اکتالیس پائپ لائن میں ہیں۔

انہوں نے کہا کہ تعاون کے چار وسیع کلسٹرز گوادر پورٹ اور اس کی معاون خصوصیات، توانائی کے منصوبے، ٹرانسپورٹ انفراسٹرکچر اور خصوصی اقتصادی زونز سیزیس کی ترقی سمیت صنعتی تعاون کی تیزی سے تکمیل سے ملک کی تجارت، کاروبار اور سرمایہ کاری کے نقطہ نظر میں تبدیلی آئے گی جبکہ عالمی سطح پر رونما ہونے والی تبدیلیوں کےمدنظر سی پیک پر پیشرفت کو مزید تیز کرنے کی ضرورت ہے۔

یہ بھی پڑھیں؛ صدر عارف علوی کی عمران خان سے ملاقات، اہم امور پر تبادلہ خیال

ان کا کہنا تھا کہ سی پیک کے دوسرے مرحلے پر تیزی سے عمل کیا جائے تاکہ زراعت، جدت ، آئی ٹی سیکٹر؛ صنعتی تعاون، ذریعہ معاش پیدا کرنا اور غربت کا خاتمہ؛ آٹوموبائل، ٹیکسٹائل اور چمڑے کی تیاری کے تعاون کو فروغ دیا جاسکے اور جہاں تک ممکن ہو چینی صنعتوں کو پاکستان منتقل کیا جائے۔

ان کا یہ بھی کہنا تھا کہ جنوری 2020 میں چین پاکستان آزاد تجارتی معاہدے پر دستخط نے تجارت کو مزید آسان کر دیا ہے جس کے نتیجے میں تجارتی حجم میں نمایاں توسیع ہوئی ہے جبکہ 27.8 بلین ڈالر 2020 کی اسی مدت کے ساتھ 60 فیصد کا اضافہ درج کیا گیا ہے اور پاکستان کی 3.6 بلین امریکی ڈالر کی برآمدات میں بھی سال بہ سال 68 فیصد اضافہ ریکارڈ ہوا ہے۔

اس موقع پر صدر مملکت نے دونوں ممالک کے درمان دفاعی اور سماجی و اقتصادی ترقی کے شعبوں میں وسیع تعاون پر اظہار اطمینان پیش کیا اور سبکدوش ہونے والے سفیر کو چینی سفارت کاری کی بہترین روایات اور پروقار طریقے کے ساتھ چین کی نمائندگی کرنے پر بھی سراہا۔

یہ بھی پڑھیں؛ بحیثیت قوم ہمیں اپنی سماجی اور ثقافتی اقدار کا تحفظ کرنا ہو گا، صدر عارف علوی

انہوں نے کہا کہ گلوبل وارمنگ کے باعث آنے والے سپر فلڈ کے دوران چین کی امداد سیلاب متاثرین کی تکالیف کو کم کرنے میں مددگار ثابت ہوئے ہیں۔

ان کا کہنا تھا کہ ایوان صدر کو ملنے والی چینی گرانٹ کا استعمال ایک ڈیجیٹل آؤٹ ریچ پلیٹ فارم بنانے کے لیے کیا جائے گا تاکہ ذہنی دباؤ یا ذہنی صحت کے مسائل کا سامنا کرنے والے لوگوں کو مدد فراہم کی جا سکے۔

ان کا یہ بھی کہنا تھا کہ خاتون اوّل اپنے آئندہ دورہ برطانیہ کے دوران برطانیہ میں مقیم پاکستانیوں کے ماہر نفسیات اور نفسیاتی ماہرین سے ان کی فعال شمولیت حاصل کریں گی تاکہ وہ ذہنی صحت کے مسائل کا سامنا کرنے والے لوگوں کو آن لائن مشاورت اور مشورے فراہم کریں۔

صدرمملکت ڈاکٹر عارف علوی نے مزید کہا کہ نیا چینی سال پاک چین تعلقات کے لئے یادگار ثابت ہوگا۔