سینیٹ اجلاس کے دوران سویڈن میں قرآن پاک کی بےحرمتی کی شدید مذمت کی گئی ہے۔

تفصیلات کے مطابق سینٹ کا اجلاس چئیرمین صادق سنجرانی کی زیر صدارت شروع ہوا جس میں سینیٹر اعظم نذیر تارڑ نے  ایوان میں معمول کا ایجنڈا معطل کرنے کی تحریک پیش  کی ۔

تحریک میں مطالبہ کیا گیا کہ وقفہ سوالات کو منسوخ کرکے سویڈن میں قرآن پاک کی بے حرمتی واقعے پر بحث کروائی جائے۔

بعدازاں سویڈن اور نیدرلینڈ میں نسل پرستوں اور شدت پسندوں کی جانب سے قرآن پاک کی بے حرمتی پر بحث کے لئے ایوان کی کارروائی معطل  کردی گئی۔

یوسف رضا گیلانی

اس موقع پر اپنے ریمارکس میں سید یوسف رضا گیلانی نے کہا کہ دونوں یورپی ممالک میں ہونے والے گھناؤنے جرم پر دنیا کے مختلف حصوں میں احتجاج ہو رہا ہے۔

یہ بھی پڑھیں: صدر مملکت کی سویڈن میں قرآن پاک کی بےحرمتی کے گھناؤنے فعل کی مذمت

انہوں نے کہا کہ یورپی ممالک کی کارروائیوں سے امت مسلمہ کے جذبات مجروح ہوئے ہیں۔

اعظم نذیر تارڑ

بحث میں حصہ لیتے ہوئے وزیر قانون اعظم نذیر تارڑ نے دونوں یورپی ممالک میں قرآن پاک کی بے حرمتی کی شدید مذمت کی۔

انہوں نے کہا کہ اسلام امن، رواداری اور بھائی چارے کا پیغام دیتا ہے اور قرآن پاک مکمل ضابطہ حیات ہے۔

وفاقی وزیر نے کہا کہ یورپی ممالک میں اسلام فوبک واقعات انتہائی تشویشناک ہیں۔

اعظم نذیر تارڑ نے کہا کہ حکومت اس معاملے کو اقوام متحدہ، او آئی سی اور یورپی یونین سمیت مناسب فورمز پر سنجیدگی سے اٹھائے گی اور ہم ذمہ دارانہ انداز میں اپنا احتجاج درج کرائیں گے۔

سینیٹر مشتاق احمد

مشتاق احمد نے کہا کہ قرآن پاک کی بے حرمتی مسلمانوں کے خلاف ایک غیر اخلاقی، اشتعال انگیز اور دہشت گردانہ حملہ ہے، سویڈن اور ہالینڈ کے سفیروں سے اس شرمناک حرکت پر مسلمانوں کے جذبات سے آگاہ کرنے کے لیے سخت احتجاج کرنے کا مطالبہ کیا۔

خواجہ آصف

وزیر دفاع خواجہ آصف نے مغربی ممالک پر زور دیا کہ وہ اسلامو فوبک واقعات کو روکیں اور کہا کہ انسانی حقوق اور آزادی اظہار کے حوالے سے ان کا دوہرا معیار عالمی امن کے لیے خطرہ ہے۔

یہ بھی پڑھیں:سویڈن میں قرآن پاک کی بےحرمتی گھناؤنا فعل اور ناقابل قبول ہے، وزیراعظم

انہوں نے کہا کہ مسلم ممالک کو اجتماعی طور پر بے حرمتی کی کارروائیوں پر اپنی ناراضگی کا اظہار کرنا چاہیے۔

وزیر دفاع نے کہا کہ مغربی ممالک میں اسلام فوبیا مسلم ممالک میں انتہا پسندی کی بڑی وجہ ہے، اگر وہ ہمارے مذہب کا احترام کرتے ہیں تو انتہا پسندانہ رجحانات کو بھی روکا جا سکتا ہے۔

خواجہ آصف نے مسلم آبادی کے خلاف بھارتی اور اسرائیلی ریاست کی سرپرستی میں دہشت گردی کی شدید مذمت کی۔