پاکستان مسلم لیگ ن کی جانب سے اعتماد کے ووٹ کے مطالبے کی قرارداد پنجاب اسمبلی میں جمع کرادی گئی ہے۔

تفصیلات کے مطابق مسلم لیگ ن کے پارلیمانی پارٹی کے اجلاس میں مشاورت کے بعد ارکان پنجاب اسمبلی نے اعتماد کے ووٹ کے مطالبے کی قرارداد جمع کرائی ہے۔

قرارداد میں مطالبہ کیا گیا ہے کہ گورنر نے اعتماد کے ووٹ کے لیے جو حکم دیا ہے اس پر آئین کے مطابق عمل کیا جائے تاہم اعتماد کے ووٹ کا مرحلہ اسپیکر یا ڈپٹی اسپیکر کی بجائے غیر جانبدار ممبر کی سربراہی میں کرایا جائے ۔

یہ بھی پڑھیں: اعتماد کے ووٹ پر ن لیگ میں ہل چل؛ بڑے لیڈروں نے سر جوڑ لئے

خیال رہے کہ قرارداد پر ن لیگ کے چار ارکان اسمبلی کے دستخط موجود ہیں ۔

اس حوالے سے لاہور ہائیکورٹ میں لیگی رہنما عطا تارڑ نے میڈیا سے گفتگو کرتے ہوئے کہا کہ تحریک عدم اعتماد کے لئے ممبرز کا ایشو ہے نہ کوئی مذاکرات ہورہے ہیں، وزیر اعلیٰ اعتماد کا ووٹ لینے سے قاصر ہیں۔

عطا تارڑ نے کہا کہ ہمارا ہدف وزیر اعلیٰ تھا اسپیکر نہیں، ابھی معاملہ عدالت میں ہے وزیر اعلیٰ گھبرائے ہوئے ہیں، وزیراعلیٰ کو ہرصورت اعتماد کا ووٹ لینا ہوگا، یہ اعتماد کے ووٹ میں شکست کھائیں گے۔

اس سے قبل ہونے والے پاکستان مسلم لیگ ن پنجاب کی پارلیمانی پارٹی کے اجلاس کی اندرونی کہانی آئی ہے ۔

اس حوالے سے ذرائع نے بتایا ہے کہ لیگی قیادت نے تمام اراکین کو پنجاب اسمبلی میں ہی رکنے اور اپنی حاضری یقینی بنانے کی ہدایت کی ہے ۔

ذرائع نے بتایا ہے کہ لیگی قیادت کی اراکین پنجاب اسمبلی کو معمول کی کارروائی نہ چلنے دینے کے لئے تمام اراکین کو “”وزیراعلی اعتماد کا ووٹ لیں”” کے بھرپور نعرے لگانے کی ہدایت کی ہے۔

اسکے علاوہ تمام اراکین ایوان کی کارروائی کے دوران مکمل الرٹ رہنے اور بھرپور ایکشن کی ہدایت کی ہے۔

یہ بھی پڑھیں: وزیر اعلیٰ اعتماد کے ووٹ میں شکست کھائیں گے، عطا تارڑ