سابق وزیر اعلیٰ پنجاب پرویز الٰہی نے کہا ہے کہ شہباز شریف اینڈ کمپنی کے منی بجٹ نے عوام کو زندہ درگو کر دیا ہے۔

تفصیلات کے مطابق سابق وزیر اعلیٰ پنجاب پرویز الٰہی نے مختلف ایڈوکیٹس سے ملاقات کی جس میں قانونی، سیاسی معاملات اور منی بجٹ کے بارے میں گفتگو ہوئی۔

چودھری پرویز الٰہی نے کہا کہ سیلز ٹیکس 18 فیصد کرنے سے مہنگائی کا طوفان آئے گا، عوام کی قوت خرید جواب دیتی جا رہی ہے، عوام ایک ہی بار الیکشن میں ن لیگ کے سب مظالم کا جواب دیں گے، عدلیہ آئین پر پہرہ دے رہی ہے، گورنر اور چیف الیکشن کمشنر کی الیکشن سے فرار کی کوششیں کامیاب نہیں ہوں گی۔

پرویز الٰہی نے کہا کہ الیکشن 90 روز میں ہی ہوں گے، ن لیگ کسی غلط فہمی میں نہ رہے، 17 منزلہ آئی ٹی ٹاور شہباز شریف نے نہیں، میں نے بنایا، مریم نواز ریکارڈ درست کر لیں۔ مریم نواز، شہباز شریف کی نالائقی چھپانے کے لیے جھوٹ کا سہارا نہ لیں۔

ان کا کہنا تھا کہ آئی ٹی ٹاور کو پورے ایشیا میں آئی ٹی حب بننا تھا، لاکھوں نوجوانوں کو روزگار ملنا تھا، شہباز شریف نے صرف میری مخالفت میں اس منصوبہ کو برباد کر دیا، پنجاب میں آئی ٹی سیکٹر میں سب کامیاب اسکیمیں میری دی ہوئی ہیں، آئی ٹی سیکٹر میں شہباز شریف کی کارکردگی صفر ہے، شہباز شریف نے عوام کو مہنگائی اور نوجوانوں کو بیروزگاری کا تحفہ دیا ہے۔