ایڈیشنل آئی جی کراچی جاوید عالم اوڈھو کی جانب سے جمعہ کے موقع پر شہر قائد میں تمام تر حفاظتی اقدامات کو انتہائی ٹھوس اور غیر معمولی بنانے کے احکامات جاری کردیے گئے ہیں۔

کراچی پولیس چیف نے نماز جمعہ کے موقع پر مساجد و امام بارگاہوں کے اطراف اور مرکزی راستوں پر سادہ لباس اور باوردی پولیس اہلکاروں کی تعیناتی کو یقینی بنانے کی ہدایت جاری کی ہے۔

جاوید عالم اوڈھو نے کہا کہ نمازیوں کی سیکیورٹی کیلئے تمام تھانہ جات کی سطح پر رابطوں کے تحت ہر ممکن اقدامات کیے جائیں، گاڑیوں اور موٹر سائیکلوں کی پارکنگ مساجد اور امام بارگاہوں سے فاصلے پر یقینی بنائی جائے۔

انکا کہنا ہے کہا کہ عوام کسی بھی مشکوک حرکت سرگرمی یا مشتبہ فرد/افراد و لاوارث گاڑی بیگ پارسل وغیرہ کی اطلاع فوری مددگار 15 یا قریبی موبائل تھانہ کو دیں۔

ایڈیشنل آئی جی نے کہا کہ کراچی میں تعینات تمام سب ڈویژنل آفیسرز اور ایس ایچ اوز نماز جمعہ کے اختتام تک ازخود سیکیورٹی اقدامات کی نگرانی کرینگے۔

کراچی پولیس چیف کی جانب سے نماز جمعہ کی ادائیگی کے دوران حفاظتی اقدامات کے پیش نظر ڈیوٹی مقام کو ہرگز نہ چھوڑنے کے احکامات بھی جاری کردیے گئے ہیں۔

جاوید عالم اوڈھو نے مزید کہا کہ شہر میں سیکیورٹی اقدامات پر عمل درآمد کے حوالے سے کسی بھی قسم کی لاپرواہی اور کوتاہی پر سخت قانونی و محکمہ جاتی کارروائی عمل میں لائی جائے گی۔