وزیراعظم محمد شہباز شریف نے کہا ہے کہ کفایت شعاری مہم پر عمل درآمد کی نگرانی خود کروں گا۔

سماجی رابطے کی ویب سائٹ ٹوئٹر پر اپنے جاری کردہ پیغام میں وزیراعظم نے کہا کہ اتحادیوں کی جانب سے حمایت پر مشکور ہوں، مشکل معاشی صورتحال کے باعث اتحادیوں اور کابینہ اراکین نے اظہار یکجہتی کیا۔

austerity measures that begin with the cabinet members voluntarily surrendering their pays, perks & privileges will save the exchequer an amount of Rs. 200 billion annually. I am grateful to all coalition partners for their support. Will personally supervise the implementation https://t.co/JlzjFZAUJ9

— Shehbaz Sharif (@CMShehbaz) February 23, 2023

انہوں نے کہا کہ اتحاد اور اجتماعی اقدامات سے مشکلات سے نکلا جاسکتا ہے۔ اتحادیوں اور کابینہ اراکین کی جانب سے تنخواہ کے بغیر رضاکارانہ خدمات قابل تحسین ہیں۔

وزیراعظم نے مزید کہا کہ کفایت شعاری مہم سے سالانہ 200 ارب روپے کی بچت ہوگی۔

واضح رہے کہ گزشتہ روز وزیراعظم شہباز شریف کی زیر صدارت وفاقی کابینہ نے کفایت شعاری اقدامات کی منظوری دے دی تھی۔

وفاقی کابینہ نے تفصیل سے کفایت شعاری کے اقدامات کا جائزہ لیا، حکومت نے کفایت شعاری کا آغاز خود سے کرنے کا فیصلہ کیا، تمام وفاقی وزرا، وزرائے مملکت، معاونین خصوصی، مشیروں نے تنخواہ اور مراعات نہ لینے کا فیصلہ کیا۔

کابینہ اجلاس سے خطاب کرتے ہوئے وزیراعظم شہباز شریف نے کہا تھا کہ حکومت کفایت شعاری کو اولین ترجیح دے رہی ہے کیونکہ وقت ہم سے پکار پکار کر کفایت شعاری، سادگی اور قربانی کا مطالبہ کر رہا ہے۔

وزیراعظم کا کہنا تھا کہ آئی ایم ایف معاہدے سے مزید مہنگائی ہوگی کیوں کہ ہمیں اس معاہدے کی وجہ سے مزید سخت فیصلے کرنا پڑیں گے۔

یہ بھی پڑھیں؛ آئی ایم ایف کی ایک اور شرط پوری 

شہباز شریف نے کہا کہ آئی ایم ایف پروگرام کی تمام شرائط پوری کی گئی ہیں، آئی ایم ایف کے ساتھ مذاکرات حتمی مراحل میں ہیں، آئی ایم ایف کے ساتھ جلد معاملات طے پاجائیں گے۔

وزیراعظم نے اعتراف کیا کہ آئی ایم ایف کے ساتھ معاہدے کے بعد کچھ مشکلات ضرور آئیں گی اور اس کے نیتجے میں مہنگائی بڑھے گی تاہم منی بجٹ میں کوشش کی گئی غریب پر بوجھ نہ پڑے۔

انہوں نے مزید کہا کہ پاکستان کو مشکلات سے نکالنے کے لیے اجتماعی کوششیں کرنا ہوں گی، ایک دن آئے گا جب آئی ایم ایف کے بغیر پاکستان ترقی کرے گا۔