سیالکوٹ: پاکستان تحریک انصاف (پی ٹی آئی) کے رہنما عثمان ڈار نے کہا ہے کہ مجھ پر کرپشن ثابت ہوجائے تو مجھے اقبال چوک پر پھانسی دی جائے۔

انٹی کرپشن آفس میں پیشی پر عثمان ڈار نے میڈیا سے گفتگو کرتے ہوئے کہا کہ مبینہ آڈیو میں میرا ذکر کہیں نہیں، اس مبینہ آڈیو کی فرانزک سے قبل وزیر اعظم کی آڈیو کال کی فرانزک ہونی چاہیے۔

انہوں نے کہا کہ کسی نے بھی کرپشن کی ہے اسکا احتساب ہونا چاہیے، مجھ پر کرپشن کا الزام ثابت ہو جائے علامہ اقبال چوک پر پھانسی دی جائے۔

انکا کہنا ہے کہ عمران خان نے 26 سال اس فرسودہ نظام کے سامنے جہاد کیا ہے، آج پیشی پر میں نے اقبال چوک میں اوپن ٹرائل کا مطالبہ کیا ہے، جو ہمیں 164 کے بیانات کی 4 وشنی میں سوالات دیے گئے ہیں ان کا جواب آئندہ پیشی 8 مارچ کو دیں گے۔

پی ٹی آئی رہنما نے کہا کہ جاوید علی قرآن پاک پر حلف دے کر الزامات کی تردید کر چکا ہے، میرے خلاف انتقامی کارروائی کی جا رہی ہے، جتنی کرپشن الزامات مجھ پر لگائے گئے ہیں اس سے دس گناہ زائد سالانہ ذکواة دیتا ہوں۔

عثمان ڈار نے مزید کہا کہ میرے خلاف ایک مخصوص چینل نے مہم چلائی، ملک سے فرار ہو گیا ہوں آج وہ چینل دیکھائے عثمان ڈار یہاں موجود ہے۔

اس سے قبل ترقیاتی کاموں میں پچاس لاکھ کی ناجائز کمیشن کے الزام پر عثمان ڈار اینٹی کرپشن کے آفس میں پیش ہوئے۔

اینٹی کرپشن دفتر میں پیشی پر تحریک انصاف کے کارکنان نے عثمان ڈار پر پھولوں کی پتیاں نچھاور کیں۔

عثمان ڈار نے اپنے موقف میں کہا کہ میرا ٹرائل اور تفتیش اوپن ہونا چاہیے، اگر مجھ پر کرپشن ثابت ہو جائے تو مجھے چوک میں پھانسی دی جائے،  نہ صرف مجھے بلکہ جس پر بھی کرپشن ثابت ہو اسے پھانسی کی سزا ہونی چاہیے۔

یہ بھی پڑھیں: عثمان ڈار کے پی اے کے بیان پر ازخود نوٹس لیا جائے، عطا تارڑ