وزیر منصوبہ بندی احسن اقبال نے کہا ہے کہ پاکستان کو سب سے بڑا نقصان سیاسی عدم استحکام سے ہوا ہے۔

تفصیلات کے مطابق وزیر منصوبہ بندی احسن اقبال پبلک سیکٹر ڈیولپمنٹ پروگرام نے ڈیجیٹلائیشن پر راؤنڈ ٹیبل کانفرنس سے خطاب کرتے ہوئے کہا کہ پبلک سیکٹر ڈیولپمنٹ پروگرام کی ڈیجیٹلائیشن کا مقصد ٹیکنالوجی سے استفادہ حاصل کرنا ہے۔

انہوں نے کہا کہ 2018 میں پی ایس ڈی پی کا بجٹ 1000 ارب تھا اور اب جب ہم حکومت میں آئے ہیں تو معلوم ہوا ہے کہ بجٹ 500 ارب رہ گیا ہے۔

ان کا کہنا تھا کہ صرف افراط زر کی بنیاد پر اس وقت پی ایس ڈی پی بجٹ 1500 ارب ہونا چاہیے تھا جبکہ ہمارے پچھلے دور حکومت میں امریکی و یورپی ممالک سی پیک میں انوسمنٹ کا پوچھتے تھے اور آج ہم لوگوں سے قرض مانگ رہے ہیں۔

یہ بھی پڑھیں؛ محدود وسائل کے باوجود حکومت سینٹرز آف ایکسیلینس کی مدد کررہی ہے، احسن اقبال

احسن اقبال نے کہا کہ آئی ایم ایف ناک سے لکیریں نکلوا رہا ہے، آئی ایم ایف اپنی مرضی کے فیصلے کروا رہا ہے۔

انہوں نے کہا کہ پچھلے برس آخری کواٹر میں وزارت خزانہ کے پاس پی ایس ڈی پی کے لیے چار ارب تک جاری کرنے کے پیسے نہ تھے۔

ان کا کہنا تھا کہ ہم اپنے ہر پروجیکٹ کے پی سی ون کو ویب سائٹ پر اپلوڈ کریں گے۔

ان کا یہ بھی کہنا تھا کہ آپس کی لڑائیاں بعد میں بھی لڑی جا سکتی ہیں، جب گھر میں آگ لگی ہو تو پہلے اسکو بجایا جاتا ہے۔

وزیر منصوبہ بندی احسن اقبال نے مزید کہا کہ پاکستان کو سب سے بڑا نقصان سیاسی عدم استحکام سے ہوا ہے۔