سی ٹی ڈی کی کارروائیوں کے دوران  مختلف شہروں سے 7 دہشت گرد گرفتار کرلئے گئے ہیں۔

تفصیلات کے مطابق کاؤنٹر ٹررزم ڈپارٹمنٹ (سی ٹی ڈی) کی جانب سے لاہور سمیت مختلف شہروں سے 7 دہشت گرد گرفتار کرلیے  گئے ہیں۔

حکام نے بتایا ہے کہ گرفتار دہشت گردوں کا تعلق کالعدم ٹی ٹی پی سے ہے جن کی شناخت ٹی ٹی پی احمد اللہ ، اسامہ ، نذیر ، حماد ، عبدالرحمان ، امان اللہ کے نام سے ہوئی ہے۔

یہ بھی پڑھیں: سی ٹی ڈی کوہاٹ کا انٹیلیجنس بیسڈ آپریشن، 6 دہشتگرد گرفتار

حکام کا کہنا تھا کہ دہشت گردوں کے خلاف سات مقدمات درج کرلیے گئے ہیں جبکہ گرفتار دہشت گردوں سے خودکش جیکٹ بنانے کا سامان ، بارودی مواد ، اسلحہ بھی برآمد کیا گیا ہے۔

حکام کے مطابق دہشت گرد حساس تنصیبات کو نشانہ بنانا چاہتے تھے۔

اس کے علاوہ مختلف کارروائیوں کے دوران رواں ہفتے 423 کومبنگ آپریشنز کے دوران 80 مشتبہ افراد گرفتار کیے گئے ہیں۔

خیال رہے کہ گزشتہ روز  محکمہ انسداد دہشت گردی کوہاٹ کی جانب سے انٹیلیجنس بیسڈ آپریشن کیا گیا تھا۔

آپریشن کے دوران دو کمانڈروں سمیت 6 دہشتگرد گرفتار کئے گئے جو کہ سنگین مقدمات میں مطلوب تھے۔

سی ٹی ڈی حکام کے مطابق کمانڈرز سمیت تمام دہشتگردوں کو تفتیش کے لئے نامعلوم مقام پر منتقل کردیا گیا ہے ۔

حکام نے بتایا ہے کہ گرفتار دہشت گردوں میں کمانڈر ایم کمال عرف راکیٹی، کمانڈر عبداللہ عرف ازرایل بھی شامل ہے۔

علاوہ ازیں لکی مروت پولیس اور کاونٹرٹیرارزم ڈیپارٹمنٹ کی جانب سے مشترکہ انٹیلیجنس بیسڈ آپریشن کے دوران دہشت گردوں کے ساتھ فائرنگ کے تبادلے میں چھ دہشتگرد مارے گئے تھے۔

ہلاک دہشت گرد پولیس پرحملوں اور دہشت گردی کے واقعات میں لکی مروت پولیس اور سی ٹی ڈی کو مطلوب تھے۔