سابق وفاقی وزیر فواد چوہدری نے کہا ہے کہ اس ملک میں آئین نہیں بچا توکچھ نہیں بچے گا۔

تفصیلات کے مطابق لاہور ہائیکورٹ بار میں تحریک انصاف کے رہنماء فواد چوہدری نے میڈیا سے گفتگو کرتے ہوئے کہا کہ پاکستان میں سپریم کورٹ آئین کی گارڈین ہے اور آئین پاکستان کو سپریم کورٹ نے بچانا ہے۔

انہوں نے کہا کہ سپریم کورٹ کے خلاف حکومتی پارٹی نے تنقید شروع کردی  ہے جبکہ ایک ہی پارٹی نے ماضی میں سپریم کورٹ پر حملہ کیا ہے، یہ سپریم کورٹ کو کمزور کررہے ہیں۔

انہوں نے مزید کہا کہ اگر ادارے ہونگے تو پاکستان ہے جبکہ چیف جسٹس پاکستان کو کمزور کرنا سپریم کورٹ کو کمزور کرنا ہے۔

یہ بھی پڑھیں: مریم نواز عدلیہ کو دباؤ میں لانے کی کوشش کررہی ہیں، فواد چوہدری

رہنما پی ٹی آئی نے کہا کہ پاکستان بار کونسل کا وفد شہباز شریف سے ملاقات کرتا ہے،وہ وفد شہباز شریف سے مراعات طے کرتا ہے پھر آکر بینچ پر عدم اعتماد کرتا ہے۔

ان کا کہنا تھا کہ آج سو سے زائد کارکنوں اور رہنما گرفتار ہیں اور انہوں نے رہائی کی آفر کو مسترد کیا ہے۔

انہوں نے بتایا کہ  پی ٹی آئی کے کسی رہنما نے ضمانت کیلئے درخواست نہیں دی ہیں اور درخواستیں جودی گئیں اس میں میڈیکل اور ملاقات کی اجازت کا کہا گیا ہے۔

انہوں نے کہا کہ یہ تمام سیاسی رہنما ہیں دہشتگرد نہیں، جیل بھرو تحریک کا مقصدعوام کے سیاسی ومعاشی حقوق کیلئے جدوجہد کا شعور ہے اور یہ تحریک پورے ملک میں جاری رہے گی۔

اس سے قبل اپنے ایک ٹوئٹ پیغام میں فواد چوہدری نے کہا ہے کہ تحریک انصاف کے کارکنان اور لیڈرشپ نے عوامی حقوق کیلئے ہتھکڑیوں کو چوما ہے اور 35 کارکنوں نے حکومت کی رہائی کی آفرمسترد کی لیڈرشپ نے رہائ کی درخواستیں دینے سے انکار کر دیا ہے۔

انہوں نے کہا کہ یہ جذبہ کسی سیاسی جماعت کارکن اور لیڈر نہیں دکھاسکتا عوام کی جماعت صرف تحریک انصاف ہے۔