ایم کیو ایم پاکستان کی جانب سے تنظیمی طاقت کے ساتھ ضمنی انتخابی میدان میں اترنے کا فیصلہ کیا گیا ہے جس کے لئے این اے کمیٹی تشکیل دے دی گئی ہے۔

اس فیصلے کیپیش نظر ایم کیو ایم پاکستان نے کراچی میں 9 این اے کمیٹیاں بنادیں گئیں ہیں، کمیٹیوں کے دفاترآج سے کھل جائیں گے اور انتخابی مہم کا بھی آج سے آغاز کردیا جائیگا۔

متحدہ پاکستان کی این اے کمیٹی، ووٹرز، برادری اورسپورٹرز سے رابطے کرے گی اور عوامی رابطہ مہم سے آغاز کرے گی۔

یہ بھی پڑھیں: ایم کیو ایم کا قومی اسمبلی کے ضمنی انتخابات میں بھرپور حصہ لینے کا فیصلہ

اس کے علاوہ ایم کیوایم پاکستان 9 حلقوں سے امیدواروں کا بھی جلد اعلان کردے گی۔

خیال رہے کہ ایم کیو ایم پاکستان نے کئی سال بعد ضمنی انتخاب میں اپنا تنظیمی اسٹرکچر فعال کردیا ہے ۔

دوسری جانب پارٹی کے کئی سینئر رہنماؤں نے بول نیوز کو بتایا کہ متحدہ قومی موومنٹ-پاکستان پاکستان ڈیموکریٹک موومنٹ (پی ڈی ایم) کی حکومت کی جانب سے پارٹی کے بنیادی مطالبات پرعملدرآمد میں ناکامی پراحتجاجاً وفاقی کابینہ سے علیحدگی پرغورکررہی ہے۔

پارٹی کے بنیادی مطالبات میں سے ایک حلقہ بندیوں کی نئی حد بندی کرنا تھا، جو نہیں کی گئیں اورجس کی وجہ سے ایم کیو ایم پاکستان نے گزشتہ ماہ ہونے والے بلدیاتی انتخابات کے بائیکاٹ کا آخری لمحات میں فیصلہ کیا۔

ایم کیو ایم کے کئی رہنماؤں کے ساتھ پس پردہ بات چیت نے اس بات کی تصدیق کی کہ کابینہ سے علیحدگی کے لیے پارٹی کی اعلیٰ صفوں میں بحث جاری ہے۔ تاہم، پارٹی مرکزمیں حکمران اتحاد چھوڑنے کا ارادہ نہیں رکھتی ہے۔