وفاقی وزیر پیٹرولیم مصدق ملک نے کہا ہے کہ آئی ایم ایف سے چار ماہ غریب آدمی کیلئے لڑا گیا ہے۔

تفصیلات کے مطابق وفاقی وزیر پیٹرولیم مصدق ملک نے میڈیا سے گفتگو کرتے ہوئے کہا کہ فیوچر کانفرنس میں شرکت کے لیے یہاں آیا ہوں، ہمارے ذہن میں خاکہ ہے جس میں لوگوں کے نوکریاں ہونگی، ہم غریب آدمی کے لیے مواقع پیدا کرنا چاہتے ہیں، آئی ایم ایف کے ساتھ معاہدہ ہو چکا تھا۔

مصدق ملک نے کہا کہ ہمارے ذہنوں میں ایک خاکہ ہے کہ مستقبل میں اچھی نوکریاں اور بہترین مواقع ہوں، اس اچھے مستقبل کے لیے ہمیں آج کچھ مشکل فیصلے کرنے پڑ رہے ہیں، یہ کہنا اچھی بات نہیں کہ سب کیا دھرا پچھلے لوگوں کا ہے، اب ہم حکومت میں ہیں ہمیں اپنا کردار ادا کرنا ہے، فنانس بل جو کل آیا وہ پہلے سے آئی ایم ایف سے طے شدہ معاملات کے باعث ہوا۔

ان کا کہنا تھا کہ آئی ایم ایف کے ساتھ ہماری ٹیم عوام کی لڑائی لڑ رہی تھی، نیا گیس کے ٹیرف پر کل میڈیا بریفنگ کر رہا ہوں، 60 فیصد لوگوں کو گیس کے ٹیرف میں ریلیف دیا گیا ہے، 60 فیصد لوگوں کا بل یا تو کم ہو گا یا پھر اتنا ہی رہے گا، ہم نے امیر اور غریب کے لیے گیس کی قیمت کا فرق کر دیا ہے، جو صاحب استطاعت ہیں ان کو بل زیادہ دینا ہو گا۔

انہوں نے کہا کہ غریب کے لیے گیس کا بوجھ کم کر دیا گیا ہے، سرکلر ڈیبٹ کا فلو گیس پر ہم نے زیرو کر دی ہے، یکم جنوری سے اب کوئی اضافی بوجھ ہم پر نہیں پڑے گا، آنے والے وقتوں میں ہمیں سرکلر ڈیبٹ کے لیے قرضے نہیں لینے ہونگے، آئی ایم ایف سے تمام کنٹریکٹ پچھلی حکومت کے ہیں۔