سیکرٹری پنجاب اسمبلی محمد خان بھٹی کی بازیابی کے معاملے پر اہلیہ کی جانب سے چیف جسٹس سے سوموٹو نوٹس لینے کا مطالبہ کیا گیا ہے۔

تفصیلات کے مطابق سیکرٹری پنجاب اسمبلی محمد خان بھٹی کی اہلیہ نے چیف جسٹس آف پاکستان کے نام خط لکھا ہے۔

اہلیہ کی جانب سے محمد خان بھٹی کی بازیابی کیلئے چیف جسٹس آف پاکستان سے سوموٹو نوٹس لینے کا مطالبہ کرتے ہوئے کہا ہے کہ اللہ تعالی کے بعد سپریم کورٹ سے ہی انصاف کی توقع ہے۔

 کوثر پروین نے اپنے خط میں کہا ہے کہ چیف جسٹس متعلقہ حکام کو حکم جاری کریں کہ وہ میرے لاپتہ شوہر کو فوری طور پر اس معزز عدالت میں پیش کریں۔

Advertisement

لاپتہ سابق سیکرٹری محمد خان بھٹی کی اہلیہ کا چیف جسٹس کے نام خط
محمد خان بھٹی کی بازیابی کیلئے سوموٹو نوٹس لینے کا مطالبہ#BOLNews #MohammadKhanBhatti pic.twitter.com/wRcYsQPkFf

— BOL Network (@BOLNETWORK) February 10, 2023

انہوں نے بتایا کہ  میرا اپنے شوہر محمد خان بھٹی سے 6 فروری 2023ء شام ساڑھے 6 بجے کے قریب آخری بار رابطہ ہوا، محمد خان بھٹی نے بتایا کہ کچھ مشکوک افراد ان کا مسلسل پیچھا کر رہے ہیں اور انہیں خطرہ ہے کہ ان کو اغوا کر لیا جائے گا۔

انہوں نے کہا کہ میڈیا میں آنے والی خبروں کے ذریعہ ان کو پتا چلا کہ ان کے شوہر کو بغیر یونیفارم کے کچھ نامعلوم افراد نے غیر قانونی طو رپر اغوا کر لیا ہے تاہم سرکاری ایجنسیاں ان کی گرفتاری قبول کرنے پر تیار نہیں جس کی وجہ سے ان کے شوہر کی زندگی مستقل خطرے میں ہے جبکہ آئین پاکستان ہر شہری کو اس کی زندگی اور آزادی کی حفاظت کی ضمانت دیتا ہے۔

اہلیہ محمد خان بھٹی نے بتایا کہ گرفتاری کی صورت میں گرفتاری کی وجوہات سے آگاہ ہونے اور اپنی بے گناہی ثابت کرنے کیلئے عدالت سے رجوع کرنے حق دیتا ہے لیکن بدقسمتی سے میرے شوہر کو ان سب حقوق سے محروم کردیا گیا ہے جو خلاف آئین بھی ہے اور خلاف قانون بھی۔

ان کا کہنا تھا کہ محمد خان بھٹی سرکاری عہدیدار کی حیثیت سے طویل عرصہ سے ملک و قوم کی خدمت کر رہے ہیں اور ان کے ساتھ اس طرح کا غیر انسانی سلوک قانون اور انصاف کا مذاق اڑانے کے مترادف ہے۔

انہوں نے بتایا کہ میں نے محمد خان بھٹی کی بازیابی کیلئے لاہور ہائیکورٹ میں رٹ پٹیشن 8655/23 دائر کر رکھی ہے جبکہ وفاقی، پنجاب اور سندھ کی حکومتوں کی طرف سے مجرمانہ حد تک عدم تعاون کے باعث ابھی تک لاہور ہائیکورٹ بھی میرے شوہر کو بازیاب نہیں کرا سکی تایم چیف جسٹس آف پاکستان سے انسانی بنیادوں پر درخواست ہے کہ وہ میری داد رسی کریں۔

یہ بھی پڑھیں: سیکرٹری پنجاب اسمبلی محمد خان بھٹی کو سندھ سے حراست میں لے لیا گیا