احتساب عدالت نے آمدن سے زائد اثاثہ جات انکوائری کیس میں سابق وزیر اعلیٰ پنجاب عثمان بزدار کی عبوری ضمانت منظور کرلی۔

تفصیلات کے مطابق لاہور کی احتساب عدالت نمبر چار کے جج سجاد احمد شیخ نے عثمان بزدار کی آمدن سے زائد اثاثہ جات انکوائری میں نیب طلبی کیس سے متعلق درخواست ضمانت پر سماعت کی۔

درخواست میں موقف اختیار کیا گیا کہ نیب نے آمدن سے زائد اثاثوں کے الزام میں انکوائری شروع کی اور آج طلب کر رکھا ہے۔  نیب نے سیاسی انتقام کا نشانہ بنانے کیلئے طلبی کا نوٹس بھجوایا۔

عثمان بزدار نے کہا کہ نیب نے پہلے اسی نوعیت کی انکوائری میں طلبی مطلوب نہ ہونے کا بیان دیا تھا، گرفتاری کا ڈر ہے، عبوری ضمانت منظور کی جائے۔

عثمان بزدار کے وکیل نے اپنے موقف میں کہا کہ پہلے نیب نے کہا تھا عثمان بزدار کی گرفتاری مطلوب نہیں ہے اور اب نوٹس بھیج دیا ہے۔

درخواست میں استدعا کی گئی کہ نیب پیشی پر گرفتاری کا خدشہ ہے، عبوری ضمانت منظور کی جائے، انکوائری اور ریفرنس کے حتمی فیصلے تک ضمانت قبل از گرفتاری بھی منظور کی جائے۔

عدالت نے نیب کو عثمان بزدار کو 27 فروری تک گرفتار کرنے سے روک دیا اور سابق وزیر اعلیٰ پنجاب کو نیب میں پیش ہونے کا بھی حکم دیا۔

بعدازاں عدالت نے سابق وزیر اعلیٰ کو 5،5 لاکھ کے 2 ضمانتی مچلکے جمع کروانے کا بھی حکم دے دیا۔