خیبر پختونخوا کے ضلع ٹانک میں تھانہ گومل پر 14/15 دہشت گردوں کے حملے کی کوشش کو ناکام بنادیا گیا ہے۔

تفصیلات کے مطابق ٹانک پولیس نے بھاری ہتھیاروں سے بھر پور جواب دیتے ہوئے دہشت گردوں کا حملہ پسپا کردیا۔

پولیس اور دہشت گردوں کے مابین 15 منٹ مقابلہ جاری رہا تاہم اس دوران کوئی جانی نقصان نہیں ہوا اور نہ ہی کوئی اہلکار زخمی ہوا۔

پولیس کی جوابی فائرنگ سے دہشت گرد رات کی تاریکی میں فرار ہوگئے تاہم حملہ آوروں کی تلاش میں پولیس کے مختلف علاقوں میں سرچ آپریشن جاری ہیں۔

دوسری جانب پشاور آئی جی خیبرپختونخوا اختر حیات خان کی جانب پولیس جوانوں کو دہشت گردوں کا حملہ ناکام بنانے پر شاباش دی گئی۔

ترجمان پولیس نے بتایا کہ آئی جی خیبرپختونخوا اختر حیات خان نے ایس ایچ او گومل اسٹیشن کو کال کی اور پوری ٹیم کی بہادری کی تعریف کی۔

ترجمان پولیس نے مزید بتایا کہ بہترین حکمت عملی، بہادری اور جوانمردی پر ایچ ایچ او کے لیے 50000روپے انعام اور توصیفی سرٹیفکیٹ کا بھی اعلان کیا گیا ہے۔

دہشت گردی کے بڑھتے واقعات

واضح رہے کہ پاکستان گزشتہ کئی سالوں سے دہشت گردی کی لپٹ میں ہے اور دہشت گردی کے ان سیکڑوں واقعات میں اب تک ہزاروں پاکستانی شہری اپنی جانیں دے چکے ہیں۔

پاکستان کے صوبہ خیبر پختونخوا میں دہشت گردی کے واقعات میں تیزی سے اضافہ ہو رہا ہے۔ صوبائی انسداد دہشت گردی فورس کے حراستی مرکز میں زیر حراست عسکریت پسندوں کی جانب سے اہلکاران اور افسران کو یرغمال بنائے جانے کے واقعہ کی وجہ سے خوف و ہراس میں مزید اضافہ ہو گیا ہے۔

یہ بھی پڑھیں: بنوں میں سیکیورٹی فورسز کی کارروائی، 4 دہشتگرد ہلاک، ایک جوان شہید

گزشتہ چند ماہ کے دوران دہشت گردی کے درجنوں واقعات پیش آئے جن میں سیکیورٹی فورسز اور پولیس سمیت کئی شہری ہلاک ہوئے۔

یاد رہے کہ پاکستان کی قومی سلامتی کمیٹی (این ایس سی) نے 27 دسمبر کو ملک میں موجود دہشت گردی کے خطرات کو بےاثر کرنے کے لیے انتھک اور بروقت جوابی اقدامات پر زور دیا۔