وزیر اعظم آزاد کشمیر سردار تنویر الیاس خان نے کہا ہے کہ مسئلہ کشمیر کو کشمیری عوام کی امنگوں کے مطابق حل کیا جائے۔

تفصیلات کے مطابق وزیر اعظم آزاد کشمیر سردار تنویر الیاس خان سے سابق صدر و وزیراعظم سردار یعقوب خان اور سابق وزیراعظم راجہ محمد فاروق حیدر خان کی ملاقات ہوئی۔

یہ ملاقات گزشتہ روز پارلیمینٹ ہاؤس کی لابی میں وزیراعظم سردار تنویر الیاس خان سے اپوزیشن رہنماؤں کی ملاقات کے تناظر میں ہوئی۔

اس موقع پر تینوں رہنماؤں نے ترکی اور شام میں زلزلہ سے ہونے والے جانی و مالی نقصان پر گہرے رنج و غم کا اظہار کیا اور تینوں رہنماؤں نے اس پر اتفاق کیا کہ آزاد کشمیر کی قومی قیادت بھی ترکی کا دورہ کرے اور اپنے غمزدہ بھائیوں کی ڈھارس بندھائے۔

یہ بھی پڑھیں؛ بھارت مقبوضہ کشمیر میں انسانی حقوق کی سنگین خلاف ورزیوں میں ملوث ہے، تنویر الیاس

ملاقات میں تینوں رہنماؤں نے پارلیمینٹ کے مشترکہ اجلاس میں کشمیر پر متفقہ قرارداد پر اطمینان کا اظہار کیا۔

وزیر اعظم آزاد کشمیر سردار تنویر الیاس خان نے کہا کہ مسئلہ کشمیر کو کشمیری عوام کی امنگوں کے مطابق حل کیا جائے، او آئی سی کو مزید متحرک کرنے کی ضرورت ہے، مغربی ملکوں خاص کر ویٹو ممالک میں سفارت کاری میں تیزی لائی جائے۔

یہ بھی پڑھیں؛ آزاد کشمیر کے عوام کو ہر ممکن ریلیف دیا جائے گا، تنویر الیاس

اس موقع پر تینوں رہنماؤں نے عزم کیا کہ کشمیری قیادت مسئلہ کشمیر اور قومی معاملوں پر یک آواز رہے گی۔

اپوزیشن رہنماء نے کہا کہ مسئلہ کشمیر اجاگر کرنے کے سلسلے میں 20 کیمپ کی حکومت کو مکمل معاونت فراہم کی جائے گی۔